5 nyied 11 hauh, dwg cietdaxmeh. Gak dieg lwgnyez cungj aeu gak cungj fuengsik daeuj docih daxmeh swhgeij, dawz gij gyaez swhgeij soengq hawj daxmeh.

Lungzswng Gak Cuz Swciyen Swsuij Yangh Sanhse Cunh, dahlwg Myauzcuz Yangz Gijgenh caeuxcaeux couh hwnqcongz, ndaej bohlungz doxbuenx, de daj ndaw mbanj naengh ci daengz ndaw yienh, caiq daj ndaw yienh naengh ci daengz Gveilinz Si, bae Gveilinz Si Yinzminz Yihyen yawj daxboh daxmeh de, daxboh daxmeh de youq yihyen ywbingh. Aenvih ngoenzneix dwg cietdaxmeh, Yangz Gijgenh youq ndaw diemqva ndaw yienh cawx ndaej duj vameizgvei ndeu daiq bae yihyen soengq hawj daxmeh.

Youq Nanzningz Si, 5 nyied 10 hauh, haujlai lwgnyez comzyouq Cinghsiu Gih Gveilinz Yinzhangz fuzvudenj, daihgya gag doengh fwngz guh hohgaj soengq hawj daxmeh, biujdap gij sim’eiq gyaez daxmeh swhgeij haenx.

(Luz Boh’an Hoz Cwngz)