Namzningz Si ginggvaq cinggouz yigen vunzlai le, ganbu caeuq vunz- youq cungj iugouz guh haenzfai maenhsaed Dahyunghgyangh, neix dwg gij banhfap ndei baujcingq Namzningz Si cingqciengz guh hong caeuq vunzlai saedceij ndaej gvaq onj gvaq ndei, hoeng, hong neix dwg hong hung, ngaenzgoek caeuq sam caiz bae gyawz aeu, gannanz gig lai. Veiz Gozcingh nyinhnaeuz, guh haenzfai gannanz dwg hung, hoeng mbouj guh gannanz yaek engqgya hung. Baez fat raemxrongz nei, ranzcang、diemqgaihuq、gunghcangj、ranzyouq cungj deng dumh, guhneix bibi daez sim diuq damj, mboujnyawz daezgonq doenghfwngz, guh ndei gij bwh. Hong lai, cix faengeiz faenbae daeuj guh, guh hong ndawsingz gonq, liux le caiq guh hong dieghenzsingz. Genhciz gag baengh bonjfaenh, haenqrengz bae guh, binaengz guh mbangj. Fatdoengh ganbu、gunghyinz、hagseng、caeuq bouxbing daeuj yivu guh hong, aensingz lwgminz lwgminz guh, gyoengqde dingh doxcanj daeuj guh hong.

Ciuq yigen Veiz Gozcingh, Namzningz Si gyoebcomz cienmonz ligliengh, bae damqcaz caeuq sezgi. Fueng’anq sezgi okdaeuj le, Veiz Gozcingh caenndang gyoeblwnh hawj goengdaeuz gozvuyen mizgven bumwnz haenx, ceng ndaej gyoengqde dingjrengz. Guekgya Suijli Denlizbu bi 1972 lied gij hong guh haenzfai re raemxrongz Yunghgyangh haeuj gij hanghmoeg cungdenj hongloet suijli daengx guek bae. Yenj Hungzconh guh boux vunzgaemhong cijveihbu haenzfai ndeu, bae Baekging aeu doxgaiq, Vuzswhgiz Guekgya hai bakdou ranzcang hawj de, youzcaih de haeujbae genj.

Guekgya vih hangh hongloet neix gonqlaeng roengz le 6000 lai fanh maenz, lwgminz soujfuj camgya yivu guh hong ndaej 300 lai fanh vunzbaez.

Haenzfai guh baenz le, lai baez dingj ndaej raemxrongz laux haenx. Daegbied dwg bi 1994 ndwen 7 baez raemxrongz laux haenx, raemx sang ndaej 75.42 mij, raemxrongz cung gij haenzfai baez youh baez, hoeng gij haenzfai Dahyunghgyangh ciuqyiengh maenhdwddwd.

Veiz Gozcingh caengz ndaej raen haenzfai guh baenz, cix diuhliz Guengjsae lo, hoeng de itcig gvansim hangh hongloet neix. Namzningz baez bungqdeng raemxrongz, de cungj gig gvansim dwk cam gij cingzgvang haenzfai Dahyunghgyangh, baez dingq naeuz mbouj miz saeh, de cix angq naeuz: “Yienghneix couh ndei lo!”

.(caengz sat)