Sizgauh buen daeuj aen laeuz caengz daihcaet neix youq ndaej haemq nanz lo, de lij caengz roxnaj saek boux, aenvih moix ranz vunz haeujok cungj gven dou.

Miz haet ndeu, daxmeh doiq Sizgauh naeuz:“Yah mwngz naengh- ndwen ndaej 10 ngoenz lo, caengz ndaej gwn gaeqdoj gvaq, mwngz bae cawx duz gaeqdoj ndeu ma ba.” Sizgauh naeuz: “Meh, gou mbouj rox cungj gaeq lawz dwg gaeqdoj, lijdwg mwngz bae cawx ba.” “Huk mwngz, vunz gwnzmbanj dawz daeuj gai dingzlai dwg gaeqdoj. Gaeqdoj bwn lai lwenq, gaeqswzliu bwn lai myox. Vaiq bae cawx.”

Sizgauh daeuj daengz gwnz hangzgaeq, lauh bae lauh dauq, yawjraen bouxgaigaeq cungj dwg ndangdaenj ndeindaep, mbouj dwg vunzmbanj. De naemj, gizlawz miz gaeqdoj gai ha? Cingq youq seizneix, Sizgauh sawqmwh raen miz goenggeq ndeu doi danci doz roengq gaeq ndeu haeuj haw daeuj, de sijsaeq yawj, raen danci myaexmyatmyat, aen roengq- gaeq gwnz laengci hix gaeuqgaq, ndaw roengqgaeq miz geij duz gaeqdon, duz daih’iek miz haj roek gaen naek, duzgaeq bwn lwenq bizbwd, gig ndeiyawj.

Goenggeq daenj aen mauhgyaz, yiemzmauh gaenq vaih haujlai giz. De daeuj daengz hangzgaeq, cap ndei ci, couh dawz gaeq roengzdaeuj, daihsing heuh: “Caen dwg gaeq bonjdoj, sinhoj ciengx ndaej baenz, cibhaj maenz it gaen, huq caen youh bienzngeih. Vaiq daeuj cawx ho, mbouj luenh daeuj bw, haj ngoenz cij daeuj gai mbat ndeu li.” Gangj sat, de aeu genbuh mad hanh gwnz najbyak bae.

Goenggeq baez heuh sat, couh miz geij yah bae veiz de. Miz yahgyaeu ndeu daj ndaw roengqgaeq gaeb duz gaeq ndeu hwnjdaeuj lumh bae lumh dauq, naeuz:“Mwngz dwg mbouj dwg gai noh naeuz noh cing, gai hing naeuz hing manh? Gij gaeq mwngz caen dwg gaeqdoj?” Goenggeq naeuz:“Lwnh sou rox, gaeqdoj bwn lai lwenq, gaeqswzliu bwn lai myox. Gaeq gou ciengx youq ndaw ndoengfaex, gueng raemz、haeuxyangz、megmax caeuq non. Mbouj dwg gangjboq, sou yawj gaeq gou, duzduz ca mbouj lai biz naek doxlumj, duzduz bwn lwenqyamyam. Gou mbouj lumj boux guh seng’eiq gai gaen cibcaet bet maenz, gou dwg gag ciengx gag gai hane.” Dingq de nyaenx gangj, couh miz geij yah cawx lo. Goenggeq caengh ndaej duz daihcaet, naeuz: “Duz neix roek gaen song liengx, 90 maenz, song liengx mbouj aeu cienz lo.” Sizgauh hix cawx duz ndeu, cawx ndaej gaeqdoj, de angq raixcaix.

Seiz gwn haeux, Sizgauh cam: “Meh, sou raen nohgaeq dwg mbouj gwg noh gaeqdoj?” Yah de naeuz: “Dwg ha. Beij nohgaeq geij ngoenz gonq ndeigwn haujlai.” Daxmeh riu naeuz: “Gou heuh mwngz caeuq vunz gwnzmbanj cawx mboujloek hane, noh gaeqdoj dangyienz lai ndei gwn lo.”

Daj haenx hwnj, Sizgauh cungj caeuq vunz gwnzmbanj cawx gaeq, saedcaih mbouj miz vunz gwnzmbanj daeuj gai gaeq, de cij nem boux guh seng’eiq cawx. Gek haj ngoenz, de couh bae caeuq goenggeq haenx cawx gaeqdoj. Sizgauh doiq goenggeq naeuz:“Mwngz ciengxgaeq bonjsaeh caen ak, haj ngoenz youh ndaej gai mbat ndeu, gai song diemjcung souhaeuj roek caet bak maenz, diuzloh fatcaiz mwngz byaij ndaej deng lo.” Goenggeq riu dwk han naeuz: “Bouxvunz miz cungj bonjsaeh ak ndeu youq gwnz ndang, couh dwg diuz loh fatcaiz ndeu, lumjbaenz de dajcaep ak, de laeuq ndaej cienz, de coih ci ak, de ra ndaej cienz …… Mwngz saenq mbouj saenq?” Sizgauh riu naeuz:“Saenq, saenq, docih mwngz! Mwngz dwg boux coengmingz ndeu!”

Miz ngoenz ndeu laj byongh- ngoenz, Sizgauh roengz laeuz daeuj byaij, sawqmwh yawjraen goenggeq gai gaeq haenx ngaem gyaeuj gaex danci roengqgaeq hoengq gvaqdaeuj, couh dongx naeuz:“Daxgoeng, daeuj caeuq gou guhcaemz roxnaeuz daeuj cunz lwg mwngz? De youq geij laeuz?” Goenggeq gyaeuj hix mbouj ngiengx, riu dwk dap naeuz:“Ngoenzneix gou youh laeuq ndaej 120 lai maenz lo. Ya, gou youq itlaeuz, aen laeuz neix dwg duh gou, mwngz mbouj rox ha?” “Ha? Mwngz mbouj dwg youq gwnzmbanj ciengx gaeq daeuj gai?” Sizgauh geizheih dwk cam.

Goenggeq ngiengx gyaeuj hwnj- daeuj, raen dwg Sizgauh, de doeksaetyat, gipmuengz naeuz: “Dwg mwngz ha, gangj vahcaen hawj mwngz rox, gou dwg cadawz simleix gyoengq- vunz guh seng’eiq haenx, moix ngoenz cangguh vunzmbanj, bae hangzgaeq genj caet bet duz gaeq ndei, ciuq gyaq bihfaz cawx, dawz bae gai gaen lai canh song sam maenz. Gou ngoenz ceiq lai guh sam diemjcung hong. Ngoenzciet gou lij bae song sam giz gai dem. Ndigah, geij bi neix daeuj, gou ngoenz guj laeuq ndaej bak baj maenz. Saehneix mwngz gaej lwnh hawj vunz rox ndaej lo.” “O, mwngz dwg byaij diuz loh fatcaiz neix……” Sizgauh gangj sat, ndawsim gig mbouj cwxcaih: Yawj daeuj daxmeh caeuq mehyah miz seiz hix gangj vahgyaj, dwg lau gou gvaqlaeng mbouj haengj bae cawx byaek ba? Hai, ngwz miz roen ngwz, goep miz loh goep, boux miz diuzloh fatcaiz duh boux ha!