展示瑶族独特风情的百朝瑶族节

□ Loz Veihyij ingj Sinhyungz hoiz

Bineix liggaeuq ndwensam cib- ngux (ligmoq 4 nyied 14 hauh), Bwzswz Si Yauzcuz Minzgenh Vwnzva Yenzgiuvei caeuq Lingzyinz Yen Cauzlij Yauzcuz Yangh Bwzcauz Cunh Cunhveij doxgap youq Bwzcauz Cunh banh le Gaiq Daih’it Bwzcauz Ciet Yisuz Vwnzva Ndawbiengz Yauzcuz, gij ngaenz guh baez hozdung neix dingzlai dwg vunzlai ndaw cunh gag comz gag ok, gij Yauzcuz daibyauj daj Yinznanz Swngj Vwnzsanh Bouxcuengh Myauzcuz Swcicouh、Hozciz Si、Bwzswz Si gak yienh daeuj haenx comz youq Bwzcauz Cunh Mbanj- dunghhou angqyangz guh hozdung, baijyienj fungsug fungcingz Yauzcuz, ciengzmienh hoenghhwd.

Baez ciet neix dwg Bwzcauz Cunh lai bi daeuj banh ndaej neiyungz ceiq lai、vunzhek daeuj ceiq lai、diegmbanj bouxhek nangq daengz ceiq gyae ndeu, caemh dwg Bwzswz Si Yauzcuz Minzgenh Vwnzva Yenzgiuvei baez daih’it youq ndaw mbanj cujciz cungj hozdung hoenghhwd vwnzva ndawbiengz neix. Aenciet aeu “cienzyiengz vwnzva ndawbiengz Yauzcuz, cauxguh binjbaiz vwnzva Mbanjyauz” guh cawjdaez, cujyau neiyungz aeu cimhra caeuq baijyienj Yauzcuz feihvuzciz vwnzva yizcanj guhcawj, baijyienj le fouxnyenz Yauzcuz、loxlezraez、dwkdomq、doiq fwen、vwnzva laeuj daengj vwnzyi cezmuz gig miz daegsaek minzcuz de, hangh yizsi coux hek couh gig miz daegsaek Yauzcuz, caenhraen gyoengq sau Yauzcuz ndwn youq bakmbanj, song dah sau aeu diuz saihwet ndeu gaem boux gyaeuj rag vang dwk laengz roen, bouxhek daeuj daengz bakmbanj cungj aeu cimz saek gaemz laeujhaeux gag siu、haeuxnaengj nyumx saek le cij ndaej haeuj mbanj, gyang mbanj dap aen daizheiq ndeu, yienj heiq diuq foux eu fwen, fouxnyenz、foux- lungzfungh、fouxfungsou、go Vahyauz gag sij daengj doxlwnz yienj mbouj sat, daengx ngoenz sing go sing fwen haprwenz, vunzlai caenx yawj ndaetfwd.

Bwzcauz Cunh dwg Lingzyinz Yen aen cunh gungzhoj guekgya dinghdiemj ndeu, daj bi’gvaq youz Guekgya Suijlibu bangfuz gvaqdaeuj, aen cunh neix giethab guh gij hozdung gyauyuz sizcenj ginzcung lusen dangj raeuz、cinghseuq lajmbanj neix, rox naemj gaenx guh, hawj yienghsiengq mbanjbya bienq- vaq gig daih, gij ranzvax vaihvad gaxgonq bienqbaenz le ranzlaeuz moqsup, roennamh gaebged gumzgamx caemh bienqbaenz le roensuijniz gvangqyub bingzbwd, caemhcaiq daj gaxgonq cij dan ndaem haeuxyangz cungj gomiuz dog ndeu hwngfat baenz ndaem miz go’ien、 gosangh、 gogoetgaeq、gaeufuzfangh daengj doenghgo dem, vunzmbanj souhaeuj ndaej demlai, saedceij ngoenz beij ngoenz ndei.