5 nyied 1 hauh (liggaeuq 4 nyied cosam), dwg ngoenzciet “ciet diuqgung ” beixnuengx Yizcuz Mbanjcejsiengz Nazboh Yen. Ngoenzde, dangdieg ginzcung caeuq gyoengq beixnuengx Yizcuz daenj buhmoq vaqmoq, daeuj daengz Mbanjcejsiengz, humx cazgo’ndoekgim, roq gyong, boq venz, ciengq go diuq foux hoh ngoenzciet, maqmuengh ndaw bi rumz swnh fwn cuk、gohaeux fungsou.

Gij laizlig “ciet diuqgung” miz gojgaeq yienghneix. Ciuhgonq, miz baez ndeu, hakbing Yizcuz caeuq vunzdig hoenxciengq, deng vunzdig dwkbaih, geij boux hakbing Yizcuz lix haenx ndoj haeuj ndaw ndoeng go’ndoekgim, go’ndoek nanwt deihdin, dangj naq vunzdig nyingz daeuj haenx. Doeklaeng, hakbing Yizcuz youq ndaw ndoeng gwn rangz dangq haeux, aeu go’ndoek guh naq, dwkhoenx vunzdig, dwk baih vunzdig, gyaep deuz vunzdig. Yizcuz beixnuengx nyinhnaeuz, dwg go- ndoekgim gouqmingh hakbing Yizcuz, go- ndoekgim dwg bouxsaenz baujhoh Yizcuz. Yienghneix, Yizcuz beixnuengx moix bi 4 nyied cosam, cungj aeu roq gyong boq venz, caeq byozgo’ndoekgim, niemhngeix cojcoeng neix.

(Fuz Mijdez)