4 nyied 25 hauh banhaet, aen 2014 nienz daengx gih Cuengh Gun song saw vah yozcenz lauxsae“angq hag Sawcuengh”sonhag beizyinbanh youq Vujmingz Yen Daibingz Cin Gingloz Siujyoz hai ban lo. Gvangjsih Minzcuz Gyauyuz Fazcanj Cungsim cujyin Couh Gwzyih daengj lingjdauj nem doenghboux lauxhangz mizgven daj Gvangjsih Sawcuengh Yozyau、Vujmingz Yen Gyauyuzgiz daeuj de daengz gwnz ban cijdauj. Gungh miz 76 boux lauxsae mizgven de daj Nanzningz、Fangzcwngzgangj、Ginhcouh、Cungzcoj daengj dieg 38 aen Cuengh Gun song saw vah siujyoz daeuj de camgya le baez beizyin neix.

Ngoenzde banhaet, Gingloz Siujyoz 3 boux lauxsae son youwzyenz de faenbied hawj gyoengq nyez ndaw Gingloz Siujyoz Youwzyenz hwnjdangz; doenggvaq dohmeizdij baijok、guhcaemz guh’angq、ok doz hai saw、lauxsae hagseng doxcam doxdap caez doenghfwngz、doeg golwgnyez daengj lai cungj hingzsik lwgnyez gyaezmaij de, youq guh’angq guh- caemz ndawde, hawj gyoengq nyez angqvauvau dwk hag“ad、aed、ed、ag、aeg、eg、ak、aek、ek”daengj gij yinhmeh Sawcuengh neix. Gij dangz neix, gyoengq yozyenz youq bangxhenz yawj de hix dingq ndaej gig mizyinx.

Baez beizyinbanh neix dwg bineix daih’it geiz cungj beizyinbanh neix. Baez neix cawzliux yawj hwnjdangz, lij miz sonhag lwnhyaeng nem diemjbingz、angq hag Sawcuengh、fwen haeuj hagdangz daengj gyauyenz nem hwnjdangz hozdung, gij hozdung neix youz doenghboux lauxhangz sonhag Vahcuengh Sawcuengh daj Gvangjsih Sawcuengh Yozyau daengj danhvei daeuj de cujciz.