Veiz Gozcingh gig gvansim ndawsingz seuqcingh. Bi 1965, miz baez ndeu de doiq sicangj Veiz Cunzsuz naeuz:“Ndawsingz uq, cujyau dwg roen mbouj ndei, wnggai guh gij roen doxlienz ndawsingz haenx baenz gij roenbwzyouz roxnaeuz gij roensuijniz.” Namzningz Si ciuq gij cijsi de, guh baenz haj roek cib diuz roensuijniz, gvaqlaeng ndawsingz cix lai seuqcingh lo.

Veiz Gozcingh mboujdanh gvansim hwnjguh ndawsingz, caemh gvansim hwnjguh dieghenzsingz. Doenghbaez de bae gvaq Sahcingj、Sinhhih Gunghse gij dieghenzsingz neix ngonzcaz, daezok mboujnoix yigen hawj gij dieg neix guh hong. Bi 1965 ndwen 7, de youq diegrog raiz saenq hawj siveij suhgi Siuh Hanz naeuz:“Gij dieghenzsingz Namzningz, wnggai youq cingjdaej gviveh Namzningz Si lajde, doenggvaq se’gyau, guh ok baudaengz haeux、byaek、mak、doenghgogai、cauh ndoeng loegvaq daengj fuengmienh cienzmienh anbaiz, gauj gij gviveh geizgyawj caeuq gij gviveh ciengzgeiz hwnjdaeuj.”

De nyinhnaeuz, gij dieghenzsingz Namzningz raemx、bwnh daengj gak fuengmienh diuzgienh cungj lai ndei, nungzyez wnggai ndaej oklai. Daj gyaeujgiuz Giuzhung Yunghgyangh gvaq Roenhung Baihnamz Dah daengz dieggunghyez, aeu bingzcingj dieg, gaijndei namh. Danghnaeuz ndaem gohaeux, wnggai ndaej moux ok cien gaen doxhwnj; danghnaeuz ndaem gobyaek, wnggai moux ok fanh gaen doxhwnj; danghnaeuz ndaem gomak, wnggai oklai; danghnaeuz ndaem gofaex, wnggai caezcup mwncup, gaej ndaem ndaej mbouj dai mbouj lix, camjca mbouj caez.

De iugouz Namzningz Si itdingh aeu miz giva dwk guh ndei swnghcanj lwgmak, guh daengz baenzbi seiqseiz gwnzhaw cungj miz mak gai, caemhcaiq gai ndaej okbae. De lij daezok aeu genj gaiq dieg habdangq ndeu ndaem go’gyoij Sihgung Yeznanz, golwg gojyij gaen aen Cungj Lingjswgvanj Yeznanz cap youq Namzningz haenx doxyaeng, doeng- gvaq vaimou gaijgez.

De nyinhnaeuz, dieghenzsingz wnggai leihyungh ndei gij dieg seizneix miz haenx. Gij se、dui dieg noix vunz lai haenx, wnggai diuzcingj ok mbangj dieg daeuj, ndaem gomak roxnaeuz doenghgogai. Gij gunghcangj homh haujlai dieg haenx, youh mbouj ndaem doxgaiq, itdingh aeu haenq- rengz ceiqdingz gyoengqde.

(caengz sat)