(ciep geizgonq)

Yienghneix, ci haihai dingzdingz, roek diemj lai lij caengz daengz Lingzli youh dingz lo, swhgih youh roengz ci coih ci, coih le haemq nanz, swhgih naeuz, coih cix coih lo, hoeng,gujsuenq ci byaij mbouj ndaej geijlai gyae youh vaih, heuh daj Vujsenh diuh ci daeuj lawh.

Youh hai le song duenh loh, yaek daengz caet diemj cung, cij daengz Hwngzyen. Swhgih siengj youq Hwngzyen Fuzvucan caeuq ci daeuj lawh haenx gyauciep, ci dingz lai nanz, daihgya dauqdaej ndaej roengzci daeuj yiet gaemz heiq ndeu lo. Daihgya yietnaiq gwn doxgaiq, boux- boux menhyaengyaeng, lumj cungj vuen’wtwt nei mbouj siengj deuz lo. Geij boux lwgnyez engq maengx, guh- angq hwnjdaeuj lo. Ci lawh lij caengz raen daeuj, fuzvuyenz heuh daihgya hwnj ci, swhgih hai ci daengz gizdieg lai gvangq bae dingz roengzdaeuj.

Seizneix, dingq gangj Cinzdangz saek ci, ci daeuj mbouj ndaej, saefouh hix daeuj mbouj ndaej lo. Seizneix, soujgih daihgya couh nauhyied hwnj- daeuj lo. Daihgya cungj lwnh caencik baengzyoux gij cingzgvang mbouj miz banhfap neix. Couh miz vunz aeu daeuj ciep vunz, gizgyawj lij heuh bae gizde gwn caeuz. Vangz lauxsae Hwngzyen hix heuh gou bae giz de, naeuz aeu daeuj ciep gou. Hwhw, cibngeih nyied 25 lo, bouxboux siengj sikhaek baema daengz ranz, miz bouxlawz lij miz sim’eiq bae giz wnq ne?

Dah sau ndeu dwk soujgih, doiq caencik roxnaeuz baengzyoux mbenj- mbimbi gangj:“Lij youq Hwngzyen Fuzvugih o……mbouj yungh daeuj, Cinzdangz saek ci……mbouj yungh, mwngz hai ci daeuj ciep gou boux ndeu baema, mbouj habsuenq.”

Daeg mbauq ndeu hix dwk soujgih, de riuhwhw naeuz: “Lij youq fuzvucan sou gizneix ne…… hwhw, mbouj bae lo, iek daengz dungx cungj ngamx lo……hwhw, mwngz daeuj couh mbouj cij haici daeuj ciep, aeu soengq caeuz daeuj cij ndaej, aeu hawj daengx ci vunz soengq caeuz cij ndaej, hwhw……”

Doengz suzse boux Se lauxsae youq gwnz QQ naeuz gou: “Heuh bouxgvan mwngz hai ci daeuj ciep mbouj ndaej ma? Vihmaz itdingh aeu nyoegnyamx swhgeij ne? ” Gizsaed, ci haihai dingzdingz, cungj laihnaeuz hai ndaej lo, nienz yaek daengz lo, bouxlawz sijndaej youq seizneix hawj caencik baengzyoux buet bae buet dauq daeuj ciep ne?

Yaek daengz gouj diemj cungj, ci ngamq daengz Yinzbiuj, gangj caiq gvaq 30 faen cung daj Namzningz miz ci daeuj lawh. Ci dingz youq rog souhfeican Yinzbiuj gauhsuzlu caj. Daihgya cungj roengz ci, boux cit ien cit ien, boux gangjgoj gangjgoj. Lwgnyez youh diuq youh foux, saenzheiq raixcaix, lumj ciengxlwenx mbouj baema cix ndaej nei. Gou hix siengj roengz ci, hoeng, gyanghwnz rumz nitnat, bik ndaej gou youh suk dauqma gwnz ci.

Gouj diemj ngeihcib faen, ci daeuj daengz lo, swhgih sien coih ci gonq. Fuzvuyenz naeuz doxgaiq lai lai, mbwn youh laep, mbouj ndei buen, aeu coih ci ndei le song gyaq ci guhdoih baema.

Daihgaiq coih le 20 faen cung, ci coih ndei lo. Daihgya sikhaek hwnj ci. Gyaq ci haenx couh mbouj caeuq dou guhdoih ma Vujsenh lo. Hainduj gou lij youheiq ci seiz mbouj seiz dingz roengzdaeuj, dauqdaej, ci caen coih ndei lo, mbouj caiq vaih lo.

Yaek cibngeih diemj cung, ci daengz camh lo. Ndaw cicamh, boux daeuj ciep gaenq caj ndaej nanz lai lo. Daihgya da ndeu couh yawjraen vunzcaen swhgeij. Gwnz mbwn fwnmoenq doek foenfoen, nit daengz ndok bae, hoeng, coenz vah raeujrub, vafwngz raeujrub, aenci daeuj ciep hix raeujrub, boux ma caeuq boux ciep, gig vaiq baema aen ranz raeujrub lo.

Gou yamq haeuj dou ranz seiz gaenq gvaq cibngeih diemj cung lo, cuengq doxgaiq roengzdaeuj, mbon soujgih okdaeuj, mbouj lumz lwnh daihgya, gou dauqdaej bingzan daengz ranz lo, guh sat baez gamjsouh cinhyin neix lo. Soujgih gou caeux couh daezsingj dienh mbouj gaeuq, seizneix hix hauq sat gaek dienh ceiq laeng, youh baeg youh naiq, gag gven gei yietnaiq lo.

Cinhyin couh yienghneix: Boux ndaej ma ranz cungj maranz, bouxboux sim gip dangqmaz. Cihek cienzbouh camgya cinhyin aen daihciengq neix, gyaqgyaq cungj dwg “cawjcieng”, mbouj miz gyaq lawz dwg “bing lawh”. Vunz lai baebae dauqdauq, daihgya cungj dawz sim beij sim, doxrox doxyungz doxbang, naihsim gaeuq, miz siuhyangj, mbouj miz vunz fatheiq. Youq ndawde yawj ndaej raen gij saedceij huzndei raeuz.

（sat）