4 nyied 13-15 hauh, 2014 Cietbuetraemx Sihsanghbanjnaz Nem Ligdaij Bi 1376 Ciengmoq haehlied hozdung youq Yinznanz Swngj Sihsanghbanjnaz Couh hoenghhwd banh sat. Geij fanh boux vunzlai dangdieg caeuq hekyouz comz youq Sihsanghbanjnaz Gingjhungz Si Dieg- dangz Buetraemx angqyangz buet- raemx, doxcaez goenghoh leihndei、ndangrengz、vuenyungz, nauhyied dangqmaz.

Cietbuetraemx dwg ngoenzciet conzdungj ceiq hoenghhwd soengq gaeuq coux moq beixnuengx Daijcuz, gaenq miz baenz cien bi lizsij. Dwen daengz gij laizlig cietbuetraemx, dangdieg riuz naeuz: Ciuhnduj, goeng fangzvuengz ndeu ciemq aeu doenghdieg Sihsanghbanjnaz gyaeu- ndei neix, guh yak guh rwix nyoegnyamx beksingq, lij ciengj aeu caet dah saulengj ma guh yah. Gyoengq dahsau haemz de dangqmaz, couh doxyaeng yaek baenzlawz gaj goeng fangzvuengz dai bae. Miz haemh ndeu, dah sau ceiq iq haenx Nungzyangh cawj byaek feih raix laeuj hom, guenq goeng fangzvuengz gwn fiz, yaeuh de gangj ok gij giznyieg aeumingh bonjndang, roxyiuj goeng fangzvuengz mbwn mbouj lau deih mbouj lau neix, ceiq lau aeu geu byoem bonjndang hotcug hoz bonjfaenh! Dah sau iq lingzled dwk siujsim ciemz aeu geu byoem hoengz goeng fangzvuengz ndeu, hotcug hwnj gwnz hoz de bae. Caen dahraix, aen’gyaeuj goeng fangzvuengz couh sikhaek goenqdoek roengzdaeuj, bienqbaenz gyoengz feizsez ndeu, ringx daengz gyawz feiz couh coemh daengz gyawz. Ranzcanx deng coemh vaih, gomiuz deng ruemx dai. Vih ndaep gyoengz feizsez neix bae, dah sau iq couh riujdawz aen’gyaeuj goeng fangzvuengz, roek dah sau wnq cix doxlwnz buet raemx hwnj aen- gyaeuj goeng fangzvuengz bae mbouj dingz, doeklaeng ndaej youq Ligdaij ndwenloeg ndaep liux feizsez lo. Gyoengq vunz ndaej bingzan vuenyungz gvaq saedceij. Daj seizhaenx gvaqdaeuj, couh miz gij fungsug sibgvenq moix bi roeb cieng buetraemx, daengz seizneix cungj fungsug neix saedcaeq gaenq baenz cungj hingzsik gyoengq vunz doxcaez hoh fuk ndeu. Ciuq gyoengq beixnuengx Daijcuz yawj daeuj, raemx dwg gij siengcwngh cinghseuq、gyaeundei、ronghcingx, gwnz seiq- gyaiq miz raemx le, fanh faed cij ndaej sengmaj, raemx dwg goengsaenz sengmingh.

15 hauh banhaet, gyoengq beixnuengx Daijcuz gwnz ndang daenj gij buhvaq minzcuz bonjfaenh moqsak gyaeuget haenx, comz youq henz Dahlanzcanghgyangh, youz goeng “Bohcangh” (boux daiq guh yizsi cunghgyau) daiq bang saulengj ndeu youq henz sokraemx guhmo gawj- hengz aeu raemx yizsi, mbaenj ndaw bi moq rumz dingh fwn yinz、leihndei habhoz, yienzhaeuh soengq boemhgim raemx ndeu bae daengz diegdangz buetraemx, bwh buet coh vunzlai, hawj vunzlai soengq bae fukheiq caeuq leihndei.

Haet de, gyoengq mehmbwk cix gak boux gag rap rap raemxsaw ndeu bae swiq siengqbaed, gouz lingzbaed baujyouh. “Swiq baed” sat le, gyoengq vunz couh hainduj doxcaez buetraemx, hoh fuk doiqfueng, maqmuengh aeu gij raemx cinghseuq neix swiq gij bingh caeuq nanh bae, vuenh gij saedceij gyaeundei vuenyungz haenx daeuj, gijneix dwg cungj buetraemx gangj laexciet ndeu. Riengzlaeng buetraemx couh haenqhoengh hwnjdaeuj, gyoengq mbauqsau doxlaeh doxcaez buet- raemx, fwngz gaem baenz rok baenz bat raemx, doq laeh doq buet coh doiqfueng. “Varaemx sinz, vunz Daij angq”, cietbuetraemx baenz le ngoenzciet angqvangh ndeu, gyoengq vunz angq dwk buet ha diuq ha, hemqhemq riuriu, varaemx sinz hwnj byonghmbwn lumj dahsien diuq foux nei, dawz gij leihndei caeuq hohfuk cienz doh ndawsim vunzlai, louz faenh dem faenh angqyangz youq diegdangz.

Ngoenzciet geizgan, lij banh miz ruzlungz doxdax、banhaemh cuengq daeng Gungjmingz、gvengbau、gaeq doxdoj、lienzvuen、huqdoj gaicawx daengj hozdung dem, ciengzmienh angqyangz nauhyied, yinxdaeuz lailai.