4 nyied 13 hauh daengz 15 hauh, Bwzswz Si Yougyangh Gih Daihcaet Gai Ciet Fwen youq Yangzhih Cin hoenghhwd gawjhengz. Ngoenzde, miz bak lai boux canghfwen Bouxcuengh、Bouxgun、Yauzcuz doxcomz youq giz ndeu, eu fwen doiq fwen, eu fwen cienzcingz, eu fwen ra youx, sing fwen goksagsag, gwnz hawfwen nauhyied dangqmaz.

Ciet fwen Yangzhih youq Cinghcauz Genzlungz nienzgan couh miz, daengz seizneix gaenq miz song bak lai bi nanz lo. Vihliux swnjcienz caeuq hungzyangz gij minzcuz conzdungj vwnzva neix, daj 2007 nienz hwnj, Bwzswz Si Yougyangh Gih dawz Hawfwen Yangzhih lied haeuj Yougyangh Gih aen hanghmoeg minzcuz conzdungj vwnzva cungdenj baujhoh、ciepcienz caeuq haifat ndeu, comzrengz caux aen Yougyangh Gih minzcuz daegsaek lijyouz vwnzva binjbaiz ndeu.(Bohdungz/波 童)