“Cingq aenvih dou seizneix doeklaeng, sojyij muengh ndaej Guekgya Dijveij dingjrengz a! Hoz- gvangq dou lij miz aen diegyouq deihleix sengcingz nanz ndaej ne!”

“Gijmaz diegyouq deihleix sengcingz nanz ndaej?”

“Gizneix gyawj Dunghnanzya a!”

Yenzsai deng Veiz Gozcingh naeuz “gyawj Dunghnazya” aen diegyouq deihleix neix gangjdoengh lo, de gaem dawz daeujien cienq geij hop le, dauq daengz daengq de naeuz: “Ndei lo! Youq swcigih soujfuj sou hwnj aen gvanjdijyuz yienhdaihvaq ba, daengzcog Dunghnazya daeuj doxdax ne, cix youq dieg sou banh.” Dingz yaep ndeu le, youh naeuz: “Gozcingh, guh cix guh ndei di, baijdaeuz aeu hung di, gvaqlaeng gou lij yaek daeuj niemhsou bw.”

Veiz Gozcingh angq naeuz: “Miz coenz vah yenzsai neix cix ndei banh lo, dou itdingh ciuq biucinj sang bae guh ndei.”

Youq gocwngz sezgi ndawde, miz cang gunghdiuz caeuq swhyienz doengrumz song cungj fueng’anq. Veiz Gozcingh doiq yungh cungjlawz lij dingh mbouj ndaej roengzdaeuj. Cinz Yi fucungjlij buenx hek guekrog daengz Namzningz le, Veiz Gozcingh lwnh gienh saeh neix hawj de nyi, de mingzgoz byaujsi: “Ciuq daegdiemj baihnamz guh, caijyungh swhyienz doengrumz dingz banhfap neix ndei.” Cinz Yi fucungjlij gangj coenz vah neix, couh hawj hangh hongloet neix noix yungh haujlai ngaenz.

Gvangjsih Dijyuzgvanj guh baenz le, Yeznanz、Laujvoh、Menjden、Cauzsenj、Nanzswhlahfuh、Ganghgoj、Gwnjnizya、Veijneisuilah daengj guekgya caeuq Yanghgangj、Aumwnz daengj digih baij gij doih binghbanghgiuz、lamzgiuz、baizgiuz、giuzbwn、soujgiuz、vujsuz haenx, gonqlaeng daeuj gizneix doxdax roxnaeuz biujyienj. Ndaw guek caemh miz haujlai doihgiuz gingciengz daeuj gizneix doxdax caeuq comzlienh.

Hojsik Ho Lungz yenzsai caiq mbouj ndaej daeuj niemhsouh hangh hongloet neix lo. Gvanjdijyuz ngamq guh baenz mbouj geij nanz, de cix souh gij cizdonz fanjgwzming Linz Byauh、Gyangh Cingh haenx haih dai lo. (caengz sat)