(ciep geizgonq)

It diemj seiqcib faen cij hai ci, deng caj nanz lo. Daengjcaj cungj hawj vunz gamjdaengz seizgan gvaq ndaej daegbied menh. Ndaw camh gizgiz cungj dwg vunz, gig mbouj yungzheih ra ndaej aen dieg ndeu naengh roengzdaeuj, youh raen seiqhenz cungj miz vunz cit ien. Gou dwgliengz caengz ndei, baez nyouq deng heiq ien couh ae’goekgoek, gig siengj bae naeuz vunz gaej cit ien lo, youh raen boux cit ien cungj dwg haj loegcib bi baedauq. Yawj gyoengqde naj ndaem fwngz dek, ndangdaenj seizbienh, henz ndang miz daeh hung daeh iq, couh rox gyoengqde dwg nungzminz okdaeuj dajhong, seizneix yaek baema ranz gvaq cieng, baema raen bohmeh、yahlwg caeuq beixnuengx gyoengqde. Seiz- neix, gou ndawsim cijmiz vih gyoengqde gouzfuk lo.

Henz ndang laeq lwgnyez ndeu dek deng gou song mbat, gou cij singj dauq, mbouj rox seizlawz dah sau ndeu daiq song laeq lwgnyez haj roek bi naengh youq henz gou. Song laeq lwgnyez cungj gig manz, yaep ndeu song ga gvih gwnz diegnaengh, yaep ndeu youh boemz roengzdaeuj, benz bae benz dauq, dahsau baenzlawz naeuz cungj mbouj dingq. Yawj lwgnyez yienghneix angqyangz, lauheiq dwg aenvih gyoengqde caeux couh ndaej daenj buhvaq moq, cawx ndaej vanzgi moq, hix lauheiq dwg aenvih yaek ndaej raen daxgoeng daxbuz gyoengqde, yaek ndaej raen gyoengq doengzdoih iq gyoengqde ba.

Ci daengzceiz lo, cicamh naeuz, ci daiq lai, dou naengh gyaq ci haenx menh di couh deng lingh geij gyaq ci lanzloh lo, haeujdaeuj mbouj ndaej, cingq baizdoih, couh hawj dou giemj biuq gonq. Song diemj bet faen, ci daeuj lo, dou vaiqvat hwnj ci. Song diemj cibsam faen, ci dauqdaej hai lo.

Ndaej baema lo! Gyoengq doengzhag daengz ranz cungj gangj “gamjsouh maranz ndei lailai”, gou seizneix yienznaeuz lij youq gwnz ci, ci cij ngamq haidoengh, hix doiq cungj gamjsouh neix gig miz gamjsouh—— caj ci baenz nanz, sim mbouj onj mbouj dingh, seizneix aen sim onjdingh lai lo, danghnaeuz daengz ranz le couh engq onjdingh lo. Daj neix gag naemj, vihmaz mbouj guenj cinhyin ci geijlai nyaengq daihgya cungj aeu maranz ne? Wnggai hix dwg ra cungj gamjsouh neix ba? Vunz youq rog youzlangh sim cungj mbouj dingh, ndawranz miz vunzcaen miz raeujrub, ma ranz sim cij onj cij raeuj.

Ndaej baema gamjsouh ndei lailai! Sim ngeix, youq gwnz ci ninz ndiu ndeu couh yaek daengz ranz lo.

Mboujliuh, ci ngamq hwnj loh- gauhsuz mbouj geijlai nanz，couhdwg youq giz liz bakloh Vujhoz lij miz 500 mij dingz roengzdaeuj lo. Youq gwnz lohgauhsuz dingz ci, itdingh miz maz saeh. Fuzvuyenz nai daihgya naeuz, ci miz di vwndiz, coih couh ndei lo. Daihgya hix mbouj miz gijmaz banhfap ndei, cij maqmuengh ci vaiq di coih ndei.

Gou cijndei hwnj QQ gvaq seizgan lo. Dahsau naengh henz ndang cimyawj soujgih gou, cam: “Daxheiz, mwngz hix rox hwnj QQ ha?” Hw, gou hwnj QQ miz maz geizheih? Gou gaenq hwnj 10 bi lo! Gamjdaengz dahsau gangj vah gig gvaqseiz, nyaenx mbouj ndaej cimyawj de. Hwhw, dahsau yawj hwnj bae nienzlingz caeuq daeglwg gou doxlumj! Gou gag raen ndeiriu, yawj daeuj, gou youq ndaw lwgda dahsau wnggai dwg ‘laux gujdungj’ lo, rox hwnj QQ mbouj dwg couh bienq geizheih loma? Dahsau gangj de haemhlwenz ngamq haidoeng liuzlieng, seizneix hwnj mbouj ndaej QQ, cam gou baenzlawz guh. Yienzlaiz soujgih de caengz hai sugi lienzciep. Hwhw, de hix miz giz mbouj rox ha. Yienghneix yawj daeuj caen dwg:

Sevei fazcanj vaiqriengrieng,

Haet yiengh haemh bienq mbouj caj vunz;

Saimbwk lauxcoz cungj mbouj lwnh,

Baez mbouj haeujsim doeklaeng vunz.

Gou gag caegcaeg sim maengx swhgeij lij nyienh hag di doxgaiq moq, lij caengz dawz swhgeij dangguh gujdungj baij youq ndaw ranz aen “bozvuzgvanj”. Danq gvaq le, gou yawj doh daengx ci, lij gaej gangj ha, cawz bae gou caeuq yahbuz ndeu, gwnz ci dingzlai cungj dwg bouxcoz ngeih samcib bi!

Seiq diemj buenq, ci dauqdaej hai ndaej doengh lo. Dou cingq maengx, mboujliuh, fuzvuyenz gangj ci caengz coih ndei, lij aeu bae bakloh Vujhoz caiq hawj saefouh coih. Youq Vujhoz, boux saefouh cingj daeuj haenx cij giemj yaep he, hix mbouj miz banhfap coih ndei. Swhgih swhgeij coih, hai ndaej bae geij bak mij, ci youh dingz lo. Gwnz ci gizgiz soujgih yiengj “did did”, daihgya hwnj vangj hwnj QQ, hainduj mbouj miz vunz haeujsim, raen daengz camh aeu mbwn laep lo, miz vunz you hwnjdaeuj. Fuzvuyenz nai daihgya naeuz: Daihgya sinhoj lo, seizneix dwg cinhyin, nyaengq lai, ci cungj baiz hong rim lo, ra mbouj ndaej ci daeuj lawh, aeu caj daengz bet diemj gvaq le cij miz gojnaengz ra ndaej ci. Yienghneix, daihgya dauq lumj lau veiznanz fuzvuyenz caeuq swhgih ityiengh nei, mbouj miz vunz caiq guhsing lo.