Bineix 3 nyied 2 hauh dwg liggaeuq ndwenngeih co’ngeih, Daih 126 Gaiq Ciet Golaux Dungcuz “ngeih nyied ngeih” Meizlinz Yangh youq Sanhgyangh Dungcuz Swciyen Meizlinz Yangh Meizlinz Cunh hoengh banh, gyoengq beixnuengx Dung、Myauz、Yauz、Gun daengj cangndang moqsup gyaeundei comz youq henz Dahyungzgyangh, doeng- gvaq banh ciengq golaux Dungcuz、ram vunzguen、ciengj bauqva daengj doenghgij hozdung fungsug minzcuz conzdungj gig miz daegsaek neix, angq hoh ngoenzciet “ngeih nyied ngeih lungz ngiengx gyaeuj” neix, mbaenj ndaw bi moq fwn yinz rumz dingh, gogo fungsou, yienghyiengh guh ndaej bae.

Meizlinz Yangh dwg Sanh- gyangh gij yanghcin golaux Dungcuz swnjcienz ndaej ceiq ndei、cienz ciengq ceiq gvangq ndawde aen ndeu, riuzmingz ndaw gih rog gih. Golaux Dungcuz dwg gij go minzcuz beixnuengx Dungcuz dangdieg youq mwh guhhong、gvaq saedceij ndawde daih cienz daih bak cienz roengz- daeuj, daengz seizneix gaenq miz 2500 lai bi lizsij, dwg seiqgyaiq feihvuzciz vwnzva yizcanj, Meizlinz Yangh 2002 nienz aeundaej mingzdaeuz ndei “ranzmbanj yisuz vwnzva ndawbiengz Guengjsae”, 2008 nienz youh ndaej Guekgya Vwnzvabu soengqhawj aen cwng- hauh “ranzmbanj yisuz vwnzva ndawbiengz Cungguek”. Moix bi youq liggaeuq ndwenngeih co’ngeih geij ngoenz seizgan ndawde, ciethoih golaux Dungcuz cungj youq Meizlinz hoengh banh, gijneix dwg hangh hozdung ndawbiengz hungloet beix- nuengx Dungcuz dangdieg gag ok ngaenz comz banh ndeu, gaiq daih’it “ngeih nyied ngeih” ciet golaux Dungcuz youq Ciuhcingh Genzlungz bingjsaenznienz couhdwg bi 1736 hainduj banh, daengz seizneix gaenq lienzdaemh banh baenz 278 bi.

Ngoenzciet, youq henz Dahyungzgyangh, gizdieg dandah gvangqlangh ndeu, cien boux vunz ciengq golaux Dungcuz dawz ngoenzciet nauh hoengh hwnjdaeuj. Daengx mbanj saimbwk lauxnyaeq cien lai vunz daenj gij ndangdaenj minzcuz bonjfaenh moqsup gyaeu- ndei haenx, youq henz laeuzgyong、henz dandah、aensaz gwnz dah mbangj ndwn mbangj naengh dwk, youq boux lingxciengq dazyinx lajde, faen baenz lai aen singbouh doengzcaez ciengq golaux Dungcuz, sing go yaep he lumj duzroeg heuh、yaep he lumj duzbid swenj, caiq miz gij sing aenvenz buenxciengq dwk, sing go sepset rwenzred, dawz gij yinx gij ndei cungj yisuz daegbied neix lengjlet yienhsag dwk baijyienj youq dangqnaj vunzlai, hawj vunz dingq dwk maezmwd, yawj dwk da’byaengq. “Gaxgonq youq diegwnq dajgoeng seiz, caenh cij ndaej caegcaeg gag ciengq go Dungcuz, seizneix ma daengz ranzmbanj bae daengz gizlawz cungj ndaej ciengq, siengj ciengq couh ciengq, lij ndaej saedyienh le gij siengjmuengh buzlan sam daih vunz caemh daiz doengzcaez ciengq dem.” Vunzmbanj Meizlinz Cunh Loz Yinlenz angq dwk doiq vunz gangj naeuz. Ngoenz haenx, De daiq dahlwg 21 bi de Loz Mingzyez caeuq dahlan 4 bi de Loz Yijdingz buzlan sam daih vunz yien fwngz ndwn youq gwnz daizheiq hung cien vunz golaux Dungcuz angqyangz ciengq golaux Dungcuz.

Youq ndaw ngoenzciet, cawz miz ciengq golaux Dungcuz cungj hozdung hung mbouj noix ndaej neix le, lij banh miz fungcingz daegsaek gag miz Dungcuz haenx youzbyaij、ram vunzguen youzbyaij、boq venz caijdangz、ciengj bauqva、yienj fouxvenz、gwn ngaiz bak ranz、diuq foux dohyeh、saeceij ciep bauqva、cuengq saz roengz Dahyungzgyangh、yawj cuengq bauqva、hoihhaemh feizdong daengj lai cungj lai yiengh fungsug minzcuz hozdung, hawj bouxhek youq ndaw nauhyied angqyangz ndaej roxyiuj fungsug fungcingz ciet hoengh golaux Dungcuz mbat ndeu.