Rumzcin cififi, mbwn lij miz di nit, haetromh gou daeujdaengz hagdangz, ngamq fwndoek gvaq, dienheiq caen ndei.

Gou byaij haeuj hagdangz daeuj, dangqnaj miz faq ciengz hungsang ndeu, gwnz ciengz veh miz Cangz- cwngz hungsang raezrang, seiqhenz faexcueng hoengzfwg, couhlumj benq fwjhaet ronghsag nei, moix ngoenz gyoengq doengzhag yawjraen de cungj gamjdaengz cingsaenz bakboix. Baih- naj faqciengz miz baiz faexcaujbit ndeu, yawj gvaqbae yienznaeuz de mbouj suenq sang, hoeng go go maj ndaej cingjcingj caezcaez, gij mbawfaex heuswdswd, yawj gvaqbae couh lumj gaiqgaiq “caujbit” dingj hwnj mbwn bae. Song henz faqciengz hung faenbied miz baiz va giuznyungz ndeu, gyoengqde deng raed dwk bingzbwdbwd, lengq dujva gaenq hai lo, duj duj nyungzyubyub hoengzujuj caen dwggyaez, sawj mwngz caen siengj gop de youq ndaw fwngz, bungj haeuj henz naj daeuj gamjsouh gij nyungzyubyub de.

Gou byaij bae naj, dangqnaj sawqmwh gvangqyub hailangh, gwnz cuzgiuzcangz gij nywj bingzbwdbwd, aenvih dwg cocin, gij nywj vanzlij mboujcaengz did ndaej mwn, yawj gvaqbae benq neix heuswd, benq haenx buenq heu buenq henj, miz geij duzroeg cingq youq gwnz diegnywj ra gwn, yaepndeu byaij ndaej vaiqvet, yaepndeu dingh ndwn youq, sawqmwh youh baenz raq mbin hwnjdaeuj, sawj mwngz gamjdaengz neix couhdwg fuk dozveh gyaeundei ndawfwngz cangh- dajveh. Doiqmienh giuzcangz miz baiz faex hungsang ndeu, daihgaiq miz cib geij go ba! Gou hix mbouj rox de dwg faex gijmaz, gou roxnyinh de maj ndaej gig miz eiqsei, gij nyefaex hopheux ganjfaex did okdaeuj, daj laj daengz gwnz baez caengz baez caengz mbouj luenh saek di. Youq benq diegnywj iq ndeu, maj song go faex- siglouz, nye faex cien diuz fanh diuz deihyaenyaen, gwnz nyefaex did ok gij mbawfaex hoengzoiq iq. Mbawfaex yienznaeuz iq, hoeng moix mbaw cungj youzlwenq youzlwenq, couhlumj daz caengz youz ndeu nei.

Hagdangz raeuz vanzlij miz haujlai gingjsaek gyaeundei dem, gou ndaej youq neix hagsib swnghhoz dwg geijlai vuenyungz ha!

（指导老师：陆全耀 林锦凤）