(ciep geizgonq)

Ndangdaej mbouj ndei, mingz- mingz rox bouxgvan dwk dienhvah daeuj cam dwg gvansim, hoeng lij mbouj hawj de vahndei. Ngunh- ngwdngwd ninz ndaek, soh daengz gyaenghwnz ndiu dauq, ok gvaq ndang hanh ndeu, ndat doiq lo. Caiq cazyawj soujgih caeuq saenqsik QQ, cij raen bouxgvan youq ndaw QQ sij:

Heiqnit ciemhciemh doiq,

Seizcin voihvoih daeuj;

Nienzhuq gaenq cawx gaeuq,

Rim ding coux caen ma.

Seiz gou okdaeuj beizyin, boux- gvan lij youq Namzningz haihoih, sanq hoih le youh bae aen ranz baengzyoux guhcaemz, 20 hauh cij baema daengz ranz, 21 hauh de lij youq ndaw QQ sij:

Gwnzbiengz heiq hom raeuj,

Raeuz nyaengq vih gvaq cieng;

Beix bwh huq gvaq nienz,

Niemh nuengx vaiq dauqma.

Gou bonjlaiz gaenq mbouj maq- muengh de ndaej bang banh nienzhuq lo, seizneix de dauq banh ndei lo, gou ndawsim couh gag angqvauvau hwnjdaeuj.

Haetcaeux, bouxgvan dwk dienhvah daeuj cam ndangdaej ndei di caengz, lij lwnh gou haujlai saehndei: Gij ngaenzgauj gou ha、ngaenz hwnjdangz ha、ngaenz simjgauj ha, lij haenh gou, gangj “ndaw ranz” bingz hawj gou bi 2013 cingzcik ndei. Hwhw, de couh dwg yienghneix daegdaengq yaeuh gou vaiqvued, hoeng gou hix lumj caen ndaej ciengj nei angqmaengx, ndawsim raeujrub, caen siengj vaiqdi daengz ranz.

Gwn haet gvaq le bae doiq fuengz. Ra mbouj raen dah vunz Siengcouh yaek caeuq gou guhdoih baema haenx. Haemhbonz gaujsi nyaengq, mbouj ndaej cam de aeu soujgih haumaj, seizneix mbouj rox baenzlawz ra raen de. Gou youq ndaw Q gyoengq fat saenqsik cam, rox de haemhlwenz gaenq baema lo.

Gwnz cigunghgyauh vunz daeg- bied lai. Gangj saedcaih, gou lij caengz bungz deng cinhyin ok dou gyae gvaq, baezneix couh ndeindei gamjsouh baez ndeu ba. Yienghneix naemj dwk, gou ndawsim couh mbouj gip mbouj muengz lo.

Daeuj daengz Langjdungh Ceh- can, ndaw camh vunz lai vunz daih, yawj bae lumj boux dep boux、boux nyoengx boux. Gou ganjvaiq bae baizdoih cawx biuq, ngoenznaengz biuq 85 maenz, seizneix gaenq hwnj daengz 90 maenz lo.

Doiq gvanbaz minzgungh ndeu doxgvaiq mbouj daezgonq daeuj cawx fei. Mehyah couh baiz youq baihlaeng gou, bouxgvan gvaqdaeuj cam, nyaemh mehyah hoed, de cij rimnaj sienhswd sohsaeng. Gou dauq daj baihndaw gamjdaengz gij unqswnh raeujrub de. Gou dawz gij gamjsouh neix fat daengz Q gyoengq bae.

Cinz gyausou bingzseiz gig siuj gangj vah, seizneix de naeuz:“Yawj gozdu mbouj doengz, gamjsouh couh mbouj doengz. Bouxgvan rimnaj sienhswd sohsaeng, hoeng, mwngz gojnaengz mbouj rox, de ndawsim gaenq nyap dai lo, naeuz yah neix hoed cungj mbouj dingz, mboujgvaq lai ok geij cib maenz, yungh yiengh- neix gauj ndaej daihgya cungj mbouj angq ma? Yah haenx gojnaengz ndawsim ngeix: Vihmaz baenzneix boihseiz ha, haq hawj ndaek vunzfeiq neix, banh di saehcingz cix banh mbouj ndei…… Hwhw, cienz dang guh’angq! Hoh daihgya gwnz loh bingzan! ”

Mbouj loek, gijneix cij dwg bingzseiz cingqdangq ngeixfap, hoeng, gou vihmaz faenmingz youq ndawde gamjdaengz gij unqswnh raeujrub ne? Dwg aenvih yah haenx yienznaeuz hoed dauq hix mbouj miz saekdi hozndat, gvan haenx deng hoed hix mbouj najsaep fatheiq? Roxnaeuz aenvih gou dwg daiq cungj siengjfap gamjsouh cinhyin daeuj dap ci, swhgeij sim mbouj fanz mbouj nyap, cienmonz ra gij ndei daeuj naemj, couh lumj Cinz gyausou gangj “cienz dang guh’angq” lo? Roxnaeuz deng gij heiqfaenh maranz caeuq vunzranz guhdoih haenx raeujrub lone?

（caengz sat）