Bonjbauq siusik (gicej Vangz Sinhyungz) “Sam nyied sam” mbouj- dan dwg ngoenzciet youqgaenj Boux- cuengh gih raeuz, caemh dwg ngoenzciet conzdungj Gun、Yauz、Myauz、Dung daengj cojyouq minzcuz de, moix bi ngoenz neix, gak cuz beixnuengx doxcomz youq giz ndeu, eu fwen ciengq go, yienj heiq diuq foux, guh gak cungj gak yiengh vwnz dij hozdung, angqyangz vuenheij, beij gvaq ndwencieng lij hoengh. Bineix dwg gih raeuz bi daih’it dingh liggaeuq “sam nyied sam” guh ngoenz cuengqgyaj daengxgyoengq vunzlai, daengx gih gak dieg youq gak gaep dangjveij cwngfuj sonyinx lajde, caez guh gak cungj gak yiengh hozdung, hawj ngoenzciet angqyangz hoenghhwd.

“Bibi sam nyied sam, bi caemh mbouj doengz bi; sing fwen goj ndaej nyi, vwnz dij guh engq hoengh.”

Youq Swcigih Soujfuj Namzningz Si, Gvangjsih Minzcuz Bozvuzgvanj 4 nyied 2-3 hauh comz guh Bouxcuengh couxhek sibgvenq fungsug、Liuz Sanhcej son fwen、bin ndoi byaij gai “sam nyied sam” daengj haehlied hozdung, banh ndaej hoenghhwd, yinx vunz bae yawj lai raeuh; ngoenzde, Cinghsiusanh Gingjgih caemh laeb le daizfwen “sam nyied sam Boux- cuengh”, yienj le 4 ciengz vwnzyi yienjok hozdung, hawj bouxyouz yawj dwk angqvauvau; ngoenz cosam de, Gaiq Daih’it Gyanghnamz Suijgaih “Sam Nyied Sam” Mbanjcuengh Hawfwen cingqsik haimuq; Gvangjsih Bozvuzgvanj、Gvangjsih Duzsuhgvanj daengj caemh guh le gak cungj gak yiengh vwnzva hozdung, hawj vunzlai dem le faenh angqyangz ndeu.

Namzningz Si gij yienhgih wnq, gak cungj hozdung caemh banh ndaej nauhyied hoenghhwd. Vujmingz Yen youq 4 nyied 1-7 hauh hoengh banh Hawfwen “Sam Nyied Sam” Nem Ciet Lijyouz Vwnzva Loegyied, 22 hangh vwnzva、dijyuz、lijyouz、ginghmou hozdung hingzsik lai yiengh、ndeiyawj yinx vunz. Hwngzyen、Sanglinz、Majsanh daengj yienh mbangj yangh- cin caemh guh le haujlai cietgingq hozdung, hawj vunzlai youq ngoenzciet ndaej angq caemz mbat ndeu.

Liujcouh Si 4 nyied 1-2 hauh youq Yizfungh Gunghyenz banh le eu fwen iucingj doxdax, daengx guek 9 aen sengjgih miz canghfwen daeuj camgya doxdax, lij youq ndaw Sizsang Vwnzva Yisuz Yenzgih banh le Gaiq Daih’it Liujcouh “Sam Nyied Sam” Minzsuz Vwnzva Baijyienj hozdung; Sanhgyangh、Yungzsuij daengj yienh (swciyen) mbangj yanghcin caemh banh le ciet fwen “sam nyied sam”、cietbauqva daengj hozdung, hawj ngoenzciet dem saek dem rongh.

Youq Gveilinz Si, Lungzswng Gak Cuz Swciyen 4 nyied 1-6 hauh banh le “sam nyied sam Bouxcuengh” cawjdaez haehlied hozdung, “ndoeng-

va Lungzciz fwen haprwenz, ‘saulengj mbanjbya’ bau aendomq”, hawj gyoengq lwgmbauq sim humznywg- nywg; ngoenzciet, Yangzsoz、Yungjfuz daengj yienhgih caemh faenbied banh le gak cungj hozdung miz daegsaek minzcuz haenx, hawj vunzlai youq ndaw ngoenzciet cetyouz angqyangz dangqmaz.

Youq Bwzswz Si, Denzyangz Yen youq 4 nyied 6-8 hauh hoenghhwd banh le ciet lijyouz vwnzva fungsug Baeuqroxdoh, geijcib fanh vunz bae caeqbaiq goengcoj Baeuqroxdoh; Lungzlinz Gak Cuz Swciyen caemh comz banh le “Hoihfwen Doxdax Sam Nyied Sam”, sing fwen sepset rwenzred, vunzlai cix dingq dwk maezmwd; Yougyangh Gih Yangzhih Cin Bulinz Cunh cix gag comz ngaenz comz vunz banh le ciet vwnzva fungsug ndawbiengz “sam nyied sam”, dawz gij fungsug ciuhgeq cienz roengzdaeuj haenx caenlik sengdoengh dwk baij- yienj youq dangqnaj vunzlai.

Hozciz Si Dava、Yizcouh、Denh- ngoz daengj siyienh (swciyen) 4 nyied 2 hauh caemh banh le cietfwen、hoihfwen daengj cietgingq hozdung, hawj ndaw luegbya gyae’gyangq haenx sing fwen haprwenz mbouj sat.

4 nyied 1-2 hauh, Laizbinh Si Hinghbinh Gih、Hozsanh Si、Sieng- couh Yen、Vujsenh Yen faenbied banh le “sam nyied sam” cietbuzyaq (buzva) hoihmiuh、 eu fwen doxdax、yienj heiq goengsae Bouxcuengh、baijyienj vwnzva fungsug minzcuz、minzcuz conzdungj vwnzva dijyuz haehlied hozdung, hawj ngoenzciet nauhyied dangqmaz.

Cungzcoj、Gveigangj、Vuzcouh、Ginhcouh、Yilinz、Hocouh daengj si gij yienhgih ndaw gyaiqguenj mbangj yanghcin caemh banh miz “sam nyied sam” cawjdaez hozdung, hawj sing fwen sing angq haprwenz doh daengx gih gak dieg.