Vanzgyangh Mauznanzcuz Swciyen Swh’wnh Cin Cungh- sinh Siujyoz gig yawjnaek hong Sawcuengh sonhag. Bineix laebbaenz aen Sawcuengh hagdangz gunghcoz muzbyauh dwg: Yungh sam bi seizgan, laemxrengz cauh Sihnanz Siujyoz、 Cinghdanz Siujyoz、Yinzhoz Siujyoz daengj sam aen hagdangz Sawcuengh daegsaek, hagdangz gak yiengh hozdung guh ndaej hoenghhwdhwd.

Gij Sawcuengh hagdangz daegsaek neix, cujyau daj cib aen fuengmienh bae cauh: It dwg moix aen hagdangz Sawcuengh lauxsae cungj aeu hag rox Sawcuengh; ngeih dwg moix aen hagdangz Sawcuengh cungj aeu laebbaenz sam aen hagseng govai hingsi siujcuj, diuq fouxminzcuz siujcuj、minzcuz dijyuz doxdax siujcuj、sijcoz siujcuj; sam dwg moix aen hagdangz Sawcuengh lauxsae、hagseng moix haggeiz cungj aeu ciengq ndaej sam souj go Vahcuengh; seiq dwg moix ngoenz cungj aeu anbaiz 10 faencueng lienh gangj byauhcunj Vahcuengh; haj dwg moix aen hagdangz Sawcuengh moix ndwen cungj aeu hawj cunghsinh siujyoz douzsoengq sam daengz、haj bien Sawcuengh cozvwnz gaujgen; roek dwg moix ngoenz banhaet caeuq gogenh seizgan cungj aeu boq go Sawcuengh; caet dwg moix aen ban cungj aeu yunghsim dwkcauh minzcuz vwnzva; bet dwg moix aen haggeiz moix aen hagdangz Sawcuengh aeu hwnj dangz Cuengh Gun song cungj vah dandaujgo hozdung; gouj dwg moix haggeiz gawjbanh baez Sawcuengh sawloih dingqsij hozdung ndeu; cib dwg dwkcauh ciengz yauyenz minzcuz vwnzva.

Vihliux guhbaenz hagdangz Sawcuengh daegsaek, sam aen hagdangz lauxsae laemxsim laemxrengz bae guh, ndaw hagdangz hozdung hoenghhwdhwd. Lauxsae yunghsim bae son, hagseng yunghsim daeuj hag, lauxsae hagseng sim’angq raixcaix, hong Sawcuengh sonhag hagdangz ngoenz beij ngoenz ndei.