“Mbwn haemh roeg haeuj rongz, cieng daengz vunz lienh gya.” Hanzgyaj seizgan dinjdet, yaek daengz cieng lij aeu daeuj hagsib beizyin, daihgya baez hainduj couh mbouj cingznyienh geijlai. Miz geij boux doengzhag maij gaujriu, mingzmingz rox mbouj miz yungh lij youq Q gyoengq caeuq lauxsae daez yigen, yauhgiuz gvaq cieng cij beizyin. Gizsaed, daihgya bouxlawz mbouj rox, haeuj cieng le aeu dajcunz baiqnienz, daihgya engq mbouj sijndaej biek ranz daeuj hagsib lo. Ndigah, haujlai doengzhag yienznaeuz daeuj daengz Namzningz hagsib, hix lumj cij daeuj guh soq nei, ndojndoj ndaijndaij daeuj le, youh sikhaek yaep fwngz naemj suenq baenzlawz vaiq di baema.

Caen dwg siengj ranz simgip ha. Ndwenlab ngeihcib seiq，lajbyongh- ngoenz haj diemj, ngamq hwnj dangz sat, haujlai doengzhag cungj aeu soemh haemh baema. Heiyu, gou caen caengz raen gvaq, daihgya cungj miz banhfap soemh haemh baema——mizmbangj gag hai ci, mizmbangj daj ndaw ranz cingj “swhgih” hai ci daeuj ciep, mizmbangj caeuxcaeux dingh cawx feici haemh, bouxlawz hix mbouj lau gwnz loh saek ci……cici caca, bubu lulu, lumj gyoengq roeg haemh cauz haeuj mbong nei, cauzhuhu, nyaengqnyatnyat, luenhlablab. Youq ndaw hagdangz Minzda, gwnz loh song mbiengj gofaex fuemxfubfub haenx, gyaqgyaq ciiq dap rim vunz, baihlaeng fot dwk heiqhoenz riengjret hai deuz, lumj raq hoenz ndeu baez yaepda couh mbouj raen saek di raemhraeuz lo. Gou gig geizheih, mbouj rox vihmaz daihgya sawqmwh bouxboux cungj miz ciiq lo, ndaw singz daihloh hix doengdat mbouj saek saekdi lo, cij laihnaeuz “cienzmienh siujgangh sevei” daezgonq daeuj daengz lune.

Ma daengz suzse, daengx aen suzse geij boux doengzhag Laizbinh engq nyaux ndaej vunz ndawsim fouzfab luenhlab. Gyoengqde bonjlaiz daezgonq cawx gvaq feihojceh banringz, aenvih lauxsae mbouj hawj daezgonq baema, youh gaij ciem daengz ngoenzcog, gangj ndei haemh neix lij youq gizneix ninz haemh ndeu. Seizneix, raen daihgya cungj soemh haemh baema, youh naengh mbouj onj lo, couh baij daibyauj bae gaij ciem feihojceh, hix aeu soemh haemh baema. Aenvih haemh le mbouj doiq ndaej fuengz, couh heuh gou ngoenzcog bang gyoengqde dawz doxgaiq gwnz congz bae doiq.

Daihgya cungj deuz lo, ndaw hagdangz sikhaek bienq ndaej hoengqhaenghaeng cingxngaungau. Rumznit cisausau, raemhfaex doengh- yabyab, daengx doengh laeuz lumj cij lw gou caeuq doengz suzse yah doengzhag Fangh lauxsae daiq lwgmbwk daj Ginhcouh daeuj haenx, rog coujlangz gij daeng haenx hix lumj gyoj haulai lo. Gij gadog youq rog fubfeb louzlangh haenx gaen dwk gij heiq nit raq dem raq ci daeuj. Gou dwg mbouj dwg daiq nyaeknye lo, simcingz cungj deng seizheiq vanzging gaem ndaeng yien dwk byaij?

Fangh lauxsae yienznaeuz coz, hoeng gig caemdingh, vunz gip de mbouj gip, vunz muengz de mbouj muengz. Gvan de ngoenzcog cij daeuj ciep de mehlwg baema, ndigah de soqlaiz cungj caemdingh, mboujguenj daihgya baenzlawz nauh baenzlawz vueng, de sim cungj mbouj doengh saekdi. De moix ngoenz lij hwnj caeux guh genmeijcauh ne, dahlwg de caeuq de ityiengh vaiqvued, caengz gangj vah naj sien riu gonq. Seizneix, youq laj daeng ronghsag, yawj raen gij naj hai songde, gou youh gamj daengz mizdi raeujrub lo.

Ngoenzlwenz haetcaeux gou swiq byoemgyaeuj, mboujmiz dencuihfungh daeuj ci sauj, nyex deng nitgengx, seizneix bingh fat naek lo, youh ae youh fatndat. Yawj baihrog laep- cupcup mbouj miz saek vunz, naemjnaemj haetcog couh ndaej baema lo, couh cenggengz dingj dwk mbouj bae cawx yw—— gangj saedcaih, youq Minzda, gou lij caen mbouj rox seizneix gizlawz miz yw gai.

Fangh lauxsae nden hawj gou ywganjmau, gangj dwg daj ndawranz daiq daeuj. Yawj dwk gij riunyumj de cungj dwg yienghneix seuqcingh unqswnh, gou gag danq: Lauheiq cingq dwg gij singq ndeigangj de sawj de baenzneix caemdingh、saeqsim ndeisim、caeuq vunz doxhuz ba.

（caengz sat）