Moix bi liggaeuq ndwensam cosam dwg ngoenzciet conzdungj Bouxcuengh, youq Mbanjcuengh Vujmingz Yen, hawfwen “sam nyied sam” moix bi caemh banh ndaej nauhyied hoenghhwd, mbauqsau doiq fwen、diuq fouxfaexsaux、ciengj bauqva、gaeq doxdoj daengj lai cungj lai yiengh hozdung caeuq gij vwnzva Bouxcuengh daegsaek noengznwd haenx ciengz dem ciengz yienj mbouj rox sat, dawz gij fungsug fungcingz Mbanjcuengh daegbied gag miz haenx baijyienj youq dangqnaj vunzlai, hawj vunz yawj gijneix lauq gijhaenx dwk baenqlaenlaen cix angqvauvau.

“Sam nyied sam” caemh heuhguh “cietfwen sam nyied sam” roxnaeuz “hawfwen sam nyied sam”, mbangj dieg cix heuhguh “noengzdoengh”, dwg cietfwen conzdungj Bouxcuengh. Ngoenzciet, dieg Bouxcuengh ranzranz naengj haeuxnaengj haj saek, dumq nyumx gyaeqgaeq saeknding, dwkcuengq cojcoeng, gaj gaeq gaj bit loengh byaek dakdaih caencik baengzyoux, guh gak cungj hozdung angq hoh ngoenzciet. Ngoenzciet itbuen gvaq song sam ngoenz, ndaw mbanj lij youq giz dieghoengq diegbingz henz mbanj dap aen bungz hung doiq fwen ndeu, dakdaih canghfwen mbanj wnq. Hawfwen Vujmingz Yen daj ciuhgeq couh gig hwnghoengh, haetromh ngoenz “sam nyied sam”, ciencien fanhfanh mbauqsau ndaw gvaengz geijcib leix haenx ndang daenj buhvaq bonj minzcuz moqsup, raek gyaeqgaeq nding caeuq haeuxnaengj haj saek, daj seiq fueng bet baih comz daengz giz ndeu doiq fwen. Geij ngoenz de, gyoengq mbauqsau mwngz coenz gou gawq, mwngz cam gou dap, hwnzngoenz mbouj dingz, sing fwen sepset rwenzred, nauhyied dangqmaz. Ngoenzciet cawz doiq fwen le, lij banh miz ciengj bauqva、dwkdomq、mbauqsau dokgyaeq daengj hozdung mizyinx, hawj vunzlai yawj dwk deihdeih bek fwngz hemq ndei, najhai sim’angq.

Daj 1985 nienz gvaqdaeuj, Vujmingz Yen lienzdaemh banh le 18 gaiq cietfwen “sam nyied sam”, 2003 nienz cingqsik dawz “cietfwen” fuk gaij baenz “hawfwen”. Ginggvaq haeujsim roengzrengz banh roengzdaeuj, seizneix hawfwen “sam nyied sam” Vujmingz gaenq baenz aen binjbaiz vwnzva gig dijbauj ndeu, baenz le aen bingzdaiz swnjcienz、hwngfat minzcuz vwnzva maenhndei, cauxguh caeuq baihrog doxgyau、cimh canghhek yinx roengzngaenz ndeu, rengzrwd dwk daiqdoengh le gij hangznieb doxgven ndaw yienh guh hoengh baenaj. 2008 nienz Hawfwen “Sam Nyied Sam” Vujmingz ndaej senj haeuj buek daihngeih swcigih gaep feihvuzciz vwnzva yizcanj mingzloeg, 2010 nienz Vujmingz Yen ndaej Vwnzvabu dingh guh “Cungguek Mbanjcuengh Vwnzva Yenzgiu Baujhoh Gihdi”. 2011 nienz, Vujmingz Yen dawz gij mingzcwng ngoenzciet demgaij baenz “Cungguek Mbanjcuengh Hawfwen ‘Sam Nyied Sam’ Vujmingz Nem Ciet Lijyouz Vwnzva Loegyied”, demgya le gij neiyungz vwnzva Loegyied ciuhnduj caeuq lijyouz hozdung, hawj ngoenzciet engq yinx vunz lo.