Ndwensam, dwg ndwen hag Leiz Fungh hozdung, hix dwg ndwen ancienz gyauyuz hozdung, caemh dwg ndwen minzcuz doxgiet gyauyuz hozdung.Vihliux fungfouq gij hozdung lauxsae caeuq hagseng, cienzmienh hengzguh suciz gyauyuz, youq ndwensam, Gveigangj Si Cinzdangz Gih Mungzgungh Minzcuz Cuhgiz Cunghyoz guh liux lai cungj lai yiengh hozdung.

Hagsib Leiz Fungh Guh Saehndei

Mungzgungh Yangh Minzcungh soqlaiz yawjnaek hagseng binjdwz gyauyuz, hagseng guh saehndei lailai. 3 nyied 5 hauh, hagdangz giethab “ndwensam, ndwen hag Leiz Fungh hozdung”, cujciz lauxsae caeuq hagseng bae Mungzgungh Yangh Gauhcanh Ginglaujyen yawj doengh bouxgeq mbouj miz lwg haenx, soengq bae gij ngaenz caeuq haeux youz lauxsae caeuq hagseng gien haenx, bang bouxlaux rap raemx、baet ranz, dawz gij raeujrub soengq hawj doengh bouxgeq bouxdog haenx. Doenggvaq cungj hozdung neix, beizyangj hagseng daj iq miz aen sim gingqgyaez bouxlaux ndeu.

Ancienz Seizseiz Geiq Ndawsim

Hagdangz giethab “ndwensam, ndwen ancienz gyauyuz hozdung”, hai aen “ancienz cihsiz gyauyuz daihhoih”, guh aen “Yenjlen Feizcoemh Seiz Baenzlawz Deuz Caeuq Baenzlawz Ndaepfeiz”. Doenggvaq gij hozdung neix, son hawj hagseng ancienz cihsiz, daezsang hagseng fuengzyiemj naengzlig. Daengq hagseng ancienz aeu seizseiz geiq ndawsim.

Minzcuz Doxgiet Gyauyuz Aeu Guh Ndei

Giethab “ndwensam, ndwen minzcuz doxgiet gyauyuz hozdung” aen cingsaenz neix, hagdangz hwngguh hong hagdangz minzcuz vwnzva gensez, senhconz vwnzva yisuz Bouxcuengh. Bineix daeuj, hagdangz yungh gij cienz hagdangz minzcuz vwnzva gensez Swcigih Gyauyuzdingh bi’gvaq hawj haenx, guhbaenz hagdangz minzcuz vwnzva cangzlangz, banh baenz “Song Vahsaw Sonhag Gveigangj”、“Dieggyaeu Caeuq Ranzgeq Bouxcuengh Gveigangj”、“Fungsug Caeuq Vwnzva Bouxcuengh Gveigangj”、“Ngoenzciet Caeuq Ndangdaenj Bouxcuengh Gveigangj” seiq aen conhlanz senhconz vwnzva yisuz Bouxcuengh, caemhcaiq lij guh baenz “Geiqaen Gyauyuz”、“Gozfangz Gyauyuz”、“Gengangh Gyauyuz”、“Swhdwz Gyauyuz” 、 “Ancienz Gyauyuz” daengj senhconz conhlanz, hwngvuengh hagdangz vwnzva gensez.

“Ginzcung Lusen Gyauyuz Sizcenj

Hozdung” Ndaej Vunz Haenh

Hagdangz boiqhab gij hong dangnaj “ginzcung lusen gyauyuz sizcenj hozdung”, hengzguh “bouxboux lauxsae roengz mbanj haeuj ranz guh gyahfangj” hozdung, bae caeuq bouxlaux lwghag gangjgoj lwnh gyauyuz、liujgaij ndaw ranz lwghag cingzgvang、cam aeu fuengfap ndei guenjleix hagdangz, guhdaengz doengzcaez son ndei、guenj ndei lwghag.

Doenggvaq baihgwnz gij hozdung neix, byaij ginzcung lusen, gyagiengz hagdangz caeuq sevei、ndaw ranz lwghag lienzhaeh, daezsang lauxsae guhhong cwzyinsinh, hawj hagseng hag baenz sibgvenq ndei, daezsang gij cunghhoz suciz hagseng.