Caemh youq seizneix, Veiz Gozcingh lij yiengq Dauz Cu caeuq gij goengdaeuz gozvuyen wnq, gangjmingz gij yencang Giuzhung Yunghgyangh caeuq gij bietaeu laebdaeb guh Giuzhung Yunghgyangh, ndaej daengz gyoengqde dingjrengz. Cunghnanzgiz Giveij doengzeiq daj gij ngaenzbwhyungh bi 1963 ndawde dawz 200 fanh maenz okdaeuj. Boux fucujyin Guekgya Giveij ngonzcaz Guengjsae le, caemh haenhdoengz Guengjsae lienzdaemh guh diuz giuz neix.

Yienghneix, Giuzhung Yunghgyangh youh ndaej hoenghhwdhwd laebdaeb guh hwnjdaeuj dem.

Hoeng, ngaenzgoek caeuq gangcaiz、suijniz daengj caengz ndaej hawj caezcienz.

Bi 1963 ndwen 2 daengz ndwen 3 duenhneix, boux fucungjlij gozvuyen Cinz Yi gonqlaeng buenxdoengz Genjbujcai Sihhahnujgwz cinvuengz caeuq guekvuengz Laujvoh Sihsaz·Vajdazna daengz Namzningz, caemhcaiq camgya baez hoihangqhoh Guengjsae Bouxcuengh Swcigih laebbaenz 50 hopbi haenx, daibyauj Cunghgung Cunghyangh caeuq gozvuyen soengq angqhoh hawj vunzlai gak cuz Guengjsae. Ciq baez seizndei neix, Veiz Gozcingh caeuq Gyauz Yaujgvangh、Cinz Yinggih lienzcoh raiz saenq hawj Cinz Yi, iugouz boux yenzsai neix bang gaijgez laebdaeb hwnj Giuzhung Yunghgyangh yungh ngaenzgoek、gangcaiz caeuq suijniz mbouj gaeuq gij vwndiz neix. Gyoengqde 3 boux doenghbaez caeuq yenzsai cungj lai sug, daegbied dwg Veiz Gozcingh, lij youq Sinhswginh caeuq Vazdungh Yejcanginh seizde couhdwg lajfwngz de. Veiz Gozcingh bae daez iugouz hawj boux yenzsai neix le, de singsangj naeuz: “Gozcingh, gaej gangj lai lo, gou yaengx song fwngz hwnjdaeuj haenhdoengz gyoengqsou laebdaeb guh diuz Giuzhung Yungh- gyangh neix. Gij iugouz sou daez haenx, gou daiq baema cingj Guekgya Giveij ngeixyaeng.” Yienzlaiz yenzsai ndwen 2 nyieddaej buenxdoengz Sihhahnujgwz daeuj Namzningz baezhaenx, de caeuq hekgviq youq Mingzyenz Fanden, vihliux gvaq dah bae feihgihcangz, yungh le mboujnoix seizgan, gaenq gig rox laebdaeb hwnj diuz giuzhung neix gig miz bietaeu lo.

(caengz sat)