Vangz lauxsae yienghlawz cungj ndei, hoeng beizheiq miz di gaenj, baengh ceiqheiq guh saeh.Youq ndaw hagdangz, Vangz lauxsae hwnj sam aen ban Yinghyij, lij dang banhcujyin aen ban ndeu, hong nyaengq ndaej lumj aen’gyangq baenq nei.

Lingjdauj naeuz, siuj Vangz ha, mwngz guh hong nyinhcaen, dwgrengz, lingjdauj yawj ndaej raen, mwngz haenqrengz bae guh, gihvei gvi boux gaenx guhhong haenx. Vangz lauxsae lumj nyouq daengz gijmaz nei, gangj, lingjdauj miz gijmaz saeh couh cig soh gangj ba! Lingjdauj naeuz, aen singhgiz laeng miz boux Yinghyij lauxsae ndeu cingjgyaj seng lwgnyez, mwngz haeb heuj caiq dingj aen ban dem. W! Ndei! Mbouj youqgaenj! Vangz lauxsae naeuz.

Vangz lauxsae engq nyaengq lo, baenzngoenz hwnjdangz caeuq gaij cozyez, mbouj ndaejhoengq saek di. Gyanghaet cawj rek souh ndeu, cawj di byaek couh gwn ngoenz ndeu, bouxcoz caen ak, ninz hwnz ndeu, ngoenz daihngeih baez iet hwet, couh lumj duz vaiziq nei, rengz dangqmaz.

Vangz lauxsae ngoenznaengz anqseiz hwnjban, mbouj cingjgyaj, gaij cozyez caeuq sidiz, seiq aen ban Yinghyij cingzcik baeznaengz cungj ndaej mingz daih’it. Siuj Vangz dwg boux lauxsae ndei ha! Vunz lauxsaed, sonhag cingzcik hix mbouj loek! Cungj vunz neix couh wnggai ndaej daezswng! Gyoengq lauxsae cungj naeuz.Vangz lauxsae swhgeij gamj- daengz dang hagdangz lingjdauj hix ndei! Bouxcoz ha, miz gihvei couh lai guh di, duenhlienh swhgeij.

Vangz lauxsae, mwngz hong nyaengq lai lo, dwgrengz ba! Lingjdauj naeuz. Mbouj miz maz, lij dingj ndaej! Vangz lauxsae naeuz.

Ndei! Lingjdauj naeuz.

Lij miz gijmaz hong lij aeu gou bae guh, mwngz couh anbaiz ba! Vangz lauxsae naeuz.

Bangunghsiz noix boux gansw ndeu, mwngz daeuj guh ba, hoeng banhcujyin caeuq 4 aen ban Yinghyij lij deng guh. Lingjdauj naeuz.

Ndei! Vangz lauxsae naeuz.

Hong bangunghsiz gansw dwg bang lauxsae yaenq swhliu, hawj lingjdauj sij vwnzgen, nyaengq seiz baenz ngoenz baenz hwnz, mbouj nyaengq seiz hix youqndwi. Hoeng caiq gya hong banhcujyin caeuq hong sonhag,Vangz lauxsae gaenq dwgrengz lai lo. Vangz lauxsae guh gansw le, aenvih yaek daengz gaujsi, youh dwg haggeiz satlaeng, aeu yaenq swhliu gig lai, lingjdauj cungjgez caizliu hix lai. Vangz lauxsae nyaengq ndaej mbouj miz seizgan saeg buh cawj haeux.

Siuj Vangz, mwngz dwgrengz lai lingjdauj rox, raeuz yaek daezswng mwngz. Lingjdauj naeuz.

Daezswng gou guh gijmaz? Vangz lauxsae naeuz.

Gijneix camhseiz mbouj lwnh mwngz nyi. Mwngz haenqrengz bae guh ba! Lingjdauj naeuz.

Guh hong caiq dwgrengz hix dij ha. Lingjdauj gaenq gangj gvaq aeu daezswng gou. Vangz lauxsae youq ndawsim gag ngeix.

Haggeiz sat, hai hoih cungjgez. Lingjdauj naeuz, hagdangz raeuz aeu daezswng buek bouxcoz lauxsae ndeu daeuj dang hagdangz lingjdauj. Lingjdauj doeg mingzcoh song boux lauxsae, hawj caezgya daujlun, yaep ndeu couh daeuzbiuq. Aensim Vangz lauxsae lumj duzdouq nei diuqyetyet. Dauqdaej caj daengz ngoenzneix lo.

Lingjdauj doeg mingzcoh Mauz lauxsae caeuq Dwng lauxsae. Caezgya couh hainduj daeuzbiuq lo.Vangz lauxsae nyinhnaeuz swhgeij dingq loek lo, yawjraen bouxwnq daeuzbiuq Mauz lauxsae caeuq Dwng lauxsae, cij rox yenzlaiz mbouj dwg swhgeij. Aensim Vangz lauxsae liengz daengz caekhaex bae. Vih gijmaz yienghneix ne? Aen gezgoj neix hawj vunz gig doeknaiq ha!

Ngoenz daihngeih, Vangz lauxsae ra lingjdauj, naeuz, lingjdauj, aenvih gou naengzlig mizhanh, mbouj miz banhfap nyaemh gij hong banhcujyin caeuq 4 aen ban goq Yinghyij, mbouj guh bangunghsiz gansw lo, cingjgouz aen haggeiz laeng cij nyaemh song aen ban Yinghyij couh ndaej lo.

Lingjdauj naemj le naeuz, ndei! Couh yienghneix guh, doengzeiq gij yauhgiuz mwngz.

Vangz lauxsae hozndat dwk byaij ok bangunghsiz lingjdauj, dingjlingz bungz deng boux fuyaucangj gip dwk byaij haeujdaeuj haenx, fuyaucangj ndaw fwngz gaem aen geb vwnzgen, vwnzgen doek youq gwnz dieg. Vangz lauxsae gungj hwet bae gip hwnjdaeuj, yawjraen daezmoeg vwnzgen sij dwk: Gij cingjsi baugau mizgven doigawj Vangz XX nyaemh fuyaucangj haenx. Vangz lauxsae seizneix dadumz lo.Vangz XX couh dwg mingzcoh de ha, hoeng ceiz lo.

Lingjdauj naeuz, bouxcoz ha, raeuz caj mwngz baenzvunz ha.

Vangz lauxsae ngaez dwk ndwn youq bakdou, haujlai nanz cij byaij deuz.