□ 符龙强 韦乐 ingj Sinhyungz hoiz

3 nyied 17-19 hauh, 2014 Ciet Lijyouz Vwnzva Danh·Nanz- danh hoenghhwd banh ndei. Gyoengq vunzlai saujsu minzcuz dangdieg gag yienj gag angq doxcomz dwk baijyienj gij vwnzva fungcingz ndangdaenj gyaeundei Bwzguyauz、Bwzguyauz raemj vaiz cuengqcaeq、fouxnyenz、fouxfaexlingz nem vwnzva caemzgvej、vwnzva yienjvuj Bouxcuengh, yinx gyoengq hekyouz camgya haeuj ndaw hozdung bae dem angq; doengzseiz lij banh ndei yienghnduj minzcuz fungcingz youz caeuq cwxcaih youz hozdung, hawj gyoengq hekyouz youq ngoenzciet ndaej roxyiuj gij vwnzva fungsug daegsaek minzcuz dangdieg caeuq yawjngonz gij gingj lajmbanj gyaeundei lumj veh haenx, angqyangz dangqmaz.

Baijyienj feihvuzciz vwnzva yizcanj, dwg baez ciet neix hangh neiyungz youqgaenj ndeu, mbat baijyienj neix faen guh gwnz daizheiq baijyienj caeuq byaij gai baijyienj song bouhfaenh. Gwnz daizheiq baijyienj le ndangdaenj Bwzguyauz ndaej lied haeuj guekgya gaep feihvuzciz vwnzva yizcanj baujhoh mingzloeg neix caeuq gofoux Myauzcuz 《Gyongmyauz Angqyangz》、gofoux Bouxcuengh《Haizgieg Doxdax》、gofoux Bwzguyauz《Ginzcwz Gwzlah》(Vahyauz yaemhoiz, eiqsei dwg “hoenx lingzgeq”) ndaej lied haeuj swcigih gaep feihvuzciz vwnzva yizcanj baujhoh mingzloeg neix daengj neiyungz; byaij gai baijyienj cix miz fouxgoepgvej、dwklongj、fouxfaexlingz、fouxfaexraiz、ndangdaenj Myauzcuz Suijcuz daengj, hawj vunzlai ndaej yawj mbat gaeuq ndeu.

Nanzdanh Yen dieg youq baihsaebaek Guengjsae raeuz, ndaej heuhguh “singzsik Cungguek” caeuq “diegndei lauxhangz gvang- vuzyoz”, vanzlij ndaej heuhguh “ranzmbanj hakdoj cien bi Cungguek”、“ranzmbanj fouxhaizgieg Cungguek” dem, “ndangdaenj Bwzguyauz”、 “yisuz aennyenz ndawbiengz Nanzdanh”、“Bouxcuengh caemz goepgvej” sam hangh neix ndaej lied haeuj guekgya gaep feihvuzciz vwnzva yizcanj baujhoh mingzloeg. “Danh vwnzva” dwg gij gyonjgyoeb comzcwk vwnzva ranghdieg Nanzdanh, baugvat vwnzva hakdoj gig miz yingjyangj haenx、vwnzva fungsug minzcuz lai cungj lai yiengh haenx、vwnzva miz gvang lai okmingz haenx、vwnzva laeujhau ndaw gih rog gih mizmingz haenx caeuq vwnzva gunghyez hunglai ronghlwenq haenx.

Youq ndaw gyaiq Nanzdanh, miz Cuengh、Gun、Yauz、Myauz、Mauznanz、Suij、Mulauj daengj minzcuz comzyouq, gizneix gyoengq vunz simsoh simsienh gaenxgyaek, gij goekdaej vwnzva minzcuz laegli naekna. Ndaw yienh miz Bwzguyauz yaek rim 3 fanh vunz, ndaej Lenzhozgoz Gohgyau Vwnzvei Cujciz beij guh “vaqsig lamqlw vwnzmingz vunzloih”, gij vwnzva aennyenz、vwnzva aeu bawx haq lwg、vwnzva dwklwggyangq、vwnzva ndangdaenj、vwnzva gofwen、vwnzva roengzcangq de lai cungj lai yiengh, ndaej beij baenz dwg duj va lengj ndaw ranz hung vwnzva Cunghvaz minzcuz ndeu; “cietyienjvuj sam nyied sam”、 vwnzva goepgvej Bouxcuengh, ndangdaenj Myauzcuz daengj gij vwnzva gig miz daegsaek neix, cix hawj vunz caenh siengj bae yawjyawj mbat ndeu.