Ngoenzlaeng, Daegsoux caen bae hagdangz dahraix. Bouxsoujdou hawj de haeuj ndaw hagdangz bae. Yo, hagdangz ranzlaeuz moqsaksak, bangxciengz sij miz vahgawq boux hungmbwk, youh lengj youh yienhda. Veh miz haujlai fuk dozveh, miz bet max biubongh, Swhmaj Gvangh dub boemh gouq nyez daengj, fukfuk veh ndaej lumjlili. Daegsoux mienh byaij mienh yawj, gwh yawj gwh angq. De gag sing iq naeuz: “Baenzlai bi mbouj daeuj hagcoj lo, siengj mbouj daengz aen hag mbanj raeuz gaenq caeuq hagdangz ndawsingz mbouj ca saek di. Yaep he, Daegsoux heiz din daengz laj bungzcwci, raen miz aen geifonghaiz ndeu, gwnz de venj miz gaiq baiz sij naeuz: Bang saeseng fong haiz, mbouj aeu cienz! Daegsoux yawj le, doeksaetyat: Nanzdauh Hoz lauxsae ndaej hoengq bang saeseng guh saeh- ndei? Daegsoux youh menhmenh byaij daengz henz laeng ranz bangunghsiz, yawj ndaw bae, raen yaucangj caeuq Hoz lauxsae geij vunz cingq gangj ndaej nauhyied. Daegsoux yawj ndaw bae, raen yaucangj dawz aen byuksaenq gig bongz ndeu, naeuz: “Hoz lauxsae, mwngz geij mbat naeuz mbouj aeu cienzhong, mbouj ndaej! Baezgonq soengq laeq lwghag din goenq bae haw, dwg mwngz bang de gyau cienzyw, lij gyau 80 maenz cienz ringz, gou gig nanzgvaq. 3000 maenz cienzhong neix, mwngz itdingh aeu. Song ndwen lai daeuj, mwngz bang hagdangz veh sij gungh 60 ngoenzhong, ngoenz cij ndaej 50 maenz, mwngz mbouj aeu, couh yiemz siuj.”

“Ndi ndi, gou ndi yiemz siuj. Ndaej bang hagdangz cang gyaeu vanzging, dwg saeh bonjfaenh gou, mbouj wnggai aeu cienzhong. Sou nyengh bik gou aeu, couh dwg yawj mbouj hwnj gou. Gou bae ma lo!” Hoz lauxsae gangj sat, ndwn hwnjdaeuj couh siengj byaij. Boux doengzsaeh ndeu gipmuengz rag de naengh roengzdaeuj, unqswnh naeuz: “Mwngz bang hagdangz veh sij, cibfaen sinhoj, cingsaenz ndei, cienzhong, mwngz wnggai aeu. Vahsug naeuz: Hag ndaej rox, gip ndaej hoj. Mwngz sij cih veh doz gig ak, dou nyengh doengz mwngz baenz rox, couh mbouj fanz mwngz lo. Ndigah, mwngz lijdwg sou cienzhong.” Yaucangj ciep dwk naeuz:“Gaej gangj baenzlai lo, sou cienzhong hwnjdaeuj. Daengz ngoenzneix, mwngz diuyouh rim 3 ndwen lo, hong veh sij hagdangz mwngz gaenq guh sat, daj ngoenzcog hwnj, mwngz youq ranz yietnaiq ba, ndaej hoengq daeuj hagdangz guhcaemz.” Hoz lauxsae naeuz: “Ndi aeu, ndi aeu, gou baema lo.”

Daegsoux raen yienghneix, aek diuqdubdub, ca di heuh oksing daeuj: Ha, Hoz lauxsae rim 60 bi la? Gij yawjfap gou cungj loek liux lo. Hoz lauxsae ha, gou doiq mbouj hwnj mwngz, luenh ngeiz mwngz lo, lwgda gou vaih lo. Hai, vaiq dauqbae, youq giuzgungj caj, cingj Hoz lauxsae gwn haeux. Daegsoux dwk soujgih hawj boux gai gaeq dawz duz gaeq iem hung ndeu daeuj……Daegsoux gikdoengh ndaej raemxda rim gvaengz, de ruzrangh byaij ok hagdangz, gwih mohdoz coh baih giuzgungj bongh gvaqbae.

(sat)