“Cietroengzdoengh” dwg ngoenzciet conzdungj beixnuengx Bouxcuengh ranghdieg Yinznanz Swngj Vwnzsanh Bouxcuengh Myauzcuz Swcicouh Funingz Yen, moix bi youq liggaeuq ndwencieng daengz ndwenseiq hoengh banh, gak cuz beixnuengx dangdieg cangndang moqsup gyaeuget, dahsau ndang daenj buhcapaek gopbien raekdaep gak cungj doxgaiq dajcang ngaenzguh haenx、fwngz gang aenliengj, daegmbauq cix daenj aen gyaeprong ndeu, doq boq mbawfaex doq ndaek samyienz, baenz bang baenz gyoengq dwk daj gij Mbanjcuengh、Ndoimyauz、Mbanjyauz seiq fueng bet baih haenx comz daengz diegbingz rog doengh, ciengq go eu fwen, cimh youx gangjgoj, nauhyied hoenghhwd.

Youq Funingz Yen,“cietroengzdoengh” caemh heuhguh “gairoengzdoengh”, ngoenz gvaq ciet cix mbouj dingh ngoenzlawz, yaek ginggvaq goenglaux caeuq goengdauh ndaw mbanj yawjngoenz cij dingh ndaej, ndigah, gij ngoenz gvaq ciet gak aen mbanj cix mbouj doxdoengz, itbuen dwg senj youq ndwencieng cibngux、 ndwenngeih co’ngeih、ndwensam cosam; gizdieg banh ciet caemh senj youq doenghnaz doenghreih gvangqlangh haenx. Aen ciet neix daengz seizneix gaenq lienzdaemh gvaq baenz 700 lai bi lo, dwg daj banh hozdung geiqniemh boux yinghyungz Bouxcuengh Nungz Cigauh cienz roengzdaeuj. Riuznaeuz seiz Ciuhbwzsung, vihliux dingjhoenx bouxgaemgienz funghgen seizhaenx apbik nyoegnyamx, Nungz Cigauh daiq gyoengq beixnuengx Bouxcuengh yaengx geiz hwnjdaeuj bae buekhoenx, ndaejhingz ciengz dem ciengz, laebbaenz le“Gueknamzdien”, gag heuhguh “Vuengznamzdien”, dwk roengz Namzningz, hoenx haeuj Ginhcouh, gung hingz Gvangjcouh, diegguenj yied daeuj yied gvangq. Doeklaeng binggijyi deng binghak dwkbaih, doenq souj Funingz. Bouxgaemgienz Ciuhbwzsung vihliux miedraeg binggijyi, gyaep gyoengq beixnuengx Bouxcuengh dangdieg bae daengz Gveicouh daengj dieg. Seiz yaek doxbiek, gyoengq beixnuengx Bouxcuengh cungj foenxfoenx doxcomz youq rog doengh, simnaiq siliengz dwk lwnh doxbiek yaek bae, caemh doxdaengq bi laeng lij aeu dauqma doxcomz raennaj. Baenzneix, moix bi liggaeuq ndwencieng daengz ndwenseiq, gij beixnuengx Bouxcuengh senj bae diegwnq youq haenx cungj dauqma ndaw mbanj caeuq gyoengq vunzcaen doxcomz, bi dem bi, daih dem daih, couh baenz le “cietroengzdoengh”.

Ngoenzciet gaxgonq, aen mbanj gvaq ciet neix couh nyaengq dwk gaj mou gaj vaiz, daemguh ceizet cawjgoj haeuxsei haeuxcig siungauz laeujhaeuxcid, bwh byaek dakdaih gak dieg beixnuengx dauqma, ndaw mbanj lij youq rog doengh dap baenz aen daizheiq ndeu, yienj Heiq- cuengh, nauhnauh yiedyied gvaq ngoenzciet.

Dangdieg Funingz miz coenz sugvah ndeu baenzneix gangj: Ngoenz “cietroengzdoengh” mbouj yawj heiq, caemh dangq lumz bae cojcoeng raeuz. Couhdwg gangj, mbouj yienj Heiqcuengh couh mbouj heuhguh “cietroengzdoengh”, baenzneix, moix bi “cietroengzdoengh” ndaw mbanj cungj yienj Heiqcuengh, noix cix miz saek song aen heiqban, lai ne miz baenz caet bet aen heiqban, cit dem cit Heiqcuengh doengxngoenz doengx- haemh riengz dwk yienj mbouj sat. Heiqcuengh faen miz heiqbingzciengz caeuq heiqhoenxciengq, doengxngoenz yienj heiq- bingzciengz, doengxhaemh yienj heiqhoenxciengq, gij daezcaiz Heiqcuengh dingzlai dwg daj gojgaeq yinghyungz Bouxcuengh caeuq gojgaeq ndawbiengz Bouxcuengh aeu daeuj bien baenz, vunzlai gyaez yawj dangqmaz. Cawz yienj Heiqcuengh le, “cietroengzdoengh” lij miz aen daegsaek yienhda dem couhdwg gyoengq mbauqsau doiq fwenyoux, itbuen gyoengq mbauqsau baez bae daengz gizdieg doxcomz, couh caegcaeg siengq ra bouxdoih doiq fwen; daengz banngaiz couh hainduj doiq fwen, doengxngoenz youq rog doengh doiq eu, doengxhaemh ma daengz ndaw mbanj, gyoengq sau youq ndaw ranz gyoengq mbauq youq rog ranz gek dou gek ciengz dwk laebdaeb doiq fwen, hwnzngoenz mbouj dingz, danghnaeuz song mbiengj miz cingz miz eiq, couh caez soengq doxgaiq dinghcingz. Gyoengq vunzlaux cix youq gwnz haw cimh caencik ra baengzyoux, gangjgoj lwnh cingzngeih, sing fwen sing riu gyukgyadgyad, ndigah“cietroengzdoengh” caemh heuhguh “hawfwen funglouz”.

Ngoenz “cietroengzdoengh” caemh baenz haw, gij dan song henz roen aen daep aen, baij gai baengzdoj nyumx lab Bouxcuengh, caemh miz Myauzsiuq caeuq “Manmyauz” aeu maesaeq haj saek daemj baenz haenx, gak saek gak yiengh, saek lwenq doz lengj, vunzraeuz gig haengjgyaez, vanzlij miz haujlai nungz fu canjbinj baij gai dem, gyoengq vunz angq dwk doxvuenh gij souhaeuj bonjfaenh guhhong ndaej ma haenx, doengzcaez faenyiengj gij angqyangz fungsou.