Bonjbauq siusik (gicej Veiz Yennaz/韦愿娜) 3 nyied 11 hauh, Sanglinz Yen youq yienh Bwzhih Cin Aicangz Cunh naj Miuhcicwngz gawjbanh “2014 Nienz Sanglinz Yen Cietsouhlaux” hozdung, fanh lai boux gak cuz beixnuengx Sanglinz caeuq bouxyouz diegrog angq hoh ngoenzciet. Ngoenzde, youq gyangdoengh naj Miuhcicwngz, sing gyong sing laz hap doh gyangdoengh, sing go sing fwen goksagsag, nauhyied dangqmaz. Ngoenzde, miz caeq goeng gouz fuk、Goengsouh sinzyouz、 diuq fouxgyonglingz、fouxgoengdauh、caij bakcax、ciengj bauqva daengj Bouxcuengh minzsuz byaujyenj, miz cuengq bauq、fouxsaeceij、eu fwen、guh vwnzyi byaujyenj nem hawj boux souhlaux soengq fukloeg daengj hozdung.

Cietsouhlaux Sanglinz dwg naeuz, Dangzgauhcuj seiz Lingjnamzvuengz、Cwngzcouh cwsij Veiz Gez ciuhvunz cungj guh saehndei, guh hak le, de cauh fuk hawj vunzlai, ndaej daengz beksingq gyaez. Doeklaeng Dangzvuengz Vuj Cwzdenh fung de guh “goengsouhlaux”. Vunz daihlaeng Sanglinz vihliux geiqniemh goenglauz hung Veiz Gez, youq moix bi liggaeuq ngeih nyied cib’it, guh hozdung baiqcaeq goengsouhlaux. Seizneix, “Cietsouhlaux” baenz le aen meijdwz gyoengqvunz gingq laux ndeu.

“Cietsouhlaux” gaenq ndaej lied haeuj swcigih feihvuzciz vwnzva yizcanj mingzloeg.