Diuz daihloh gvaq giuzgungj faen sam ca, ca ndeu doeng hagdangz, ca ndeu rangh bae haw, ca ndeu yiet daengz Mbanjmbwk.

Henz giuzgungj miz aen ranzdog nenj haeux ndeu, dwg ranz Daegsoux. Daegsoux bineix seiqcib lai bi lo, gaenx hong haengj bang vunz, doiq vunzrwix saehrwix gig haemz. Daegsoux bae rog guhhong laeuqcienz cib geij bi lo, seiq ndwen gonq ngamq dauq ranzmbanj lawh boh de nenj haeux, aenvih boh de nienz geq lo.

Miz haet ndeu gouj diemj cung, Daegsoux youq naj douranz nenj haeux, sawqmwh yawjraen Hoz lauxsae gwih aen cidendung ndeu daj Mbanjmbwk okdaeuj bae hagdangz. Daegsoux gipmuengz dongx Hoz lauxsae, heuh de dingz yaep he, songde haujlai bi mbouj raennaj lo, song vunz angq dwk gangjgoj yaep ndeu le, Hoz lauxsae couh naeuz: “Gou bae hagdangz lo.”

“Lauxsae byaijndei nw!” Daeg- soux naeuz.

Daj ngoenz haenx hwnj, Daeg- soux ca mbouj lai ngoenzngoenz haetcaeux gouj diemj cung couh yawjraen Hoz lauxsae gwih ci daj henz ranznenjhaeux bae hagdangz. Raen lai le, Daegsoux nyaenx mbouj ndaej caeuq vunz ndaw mbanj naeuz:“Gyoengq saeseng youq hagdangz haenx hwnj ndaej it ngeih dangz le, haet gouj diemj, laj byonghngoenz sam diemj, Hoz lauxsae ngamq bae hagdangz, cuengqhag le, de doengz lwghag caez dauq. Caen dwg meuzlaux nyouh henj bw. Seizgonq, Hoz lauxsae son dou, nyengh gig gaenx, dwg boux lauxsae dangjyenz youhsiu ndeu. Banneix, gou raen de bienq lo. Lauxsae mbouj souj gijliz, lingjdauj hix mbouj guenj, nguh lwglan raeuz bw. Ndaej hoengq gou itdingh bae caeuq lingjdauj fanjyingj mbat ndeu.” Miz vunz naeuz: “Byawz miz aen bak lawz gwn aen mak lawz, lau mwngz guenj mbouj ndaej bw.” “Mbouj ndaej, mbouj ndaej hix aeu guenj!”

Miz ngoenz ndeu, Daegsoux bae haw cawx doxgaiq. De daj gyae yawjraen yaucangj caeuq Hoz lauxsae nem laeq lwghag ndeu youq laj dingzhaw gwn haeux. Daegsoux laeglemx byaij gvaqbae baex youq gasaeu henz dingz guhcaeg dingq yawj. Yaep he, de raen Hoz lauxsae yaek cienz okdaeuj, naeuz: “Dahsau, sou cienz, aeu geijlai?”

“Gungh 80 maenz.”Dahsau naeuz.

Yaucangj sikhaek ndwn hwnj- daeuj: “Gou gyau cienz, gaej aeu cienz Hoz lauxsae.” Songde nyoengx bae nyoengx dauq, dahsau lijdwg sou cienz Hoz lauxsae. Daegsoux raen yienghneix, nyaeuq da sim siengj, yenzlaiz Hoz lauxsae gig rox bungjbauq lingjdauj, gvaiq mbouj ndaej de baenzneix swyouz. O, gou ngeix hwnjdaeuj lo, miz lwghag naeuz, Hoz lauxsae cawx miz aen geifonghaiz ndeu, cuengq youq hagdangz, baez ndaej hoengq de couh bang lwghag fong haiz fong daehsaw. Caen dwg itmienh son saw itmienh guh seng’eiq laeuqcienz. Dingz lauxsae neix mbouj noix bw. Lwghag gangj, gou mbouj saenq. Ngoenzlwenz gou bang vunz- wnq doz raemz baema ginggvaq hagdangz, daj rog yawj ndaw bae, caen raen Hoz lauxsae youq hag dangz fong haiz dahraix. Hai, caendwg liengzsim mbouj cuk ngwz ndwnj ciengh bw. Roeg dam gwn vaih ai, vunz dam caiz vaih mingh. Lauxsae ha, siujsim di bw. Lauxsae ngoenzngoenz daengzceiz, nguh lwglan mbanj raeuz lai lo, ngoenzcog gou aeu dingz hong bae hagdangz yaep he.(caengz sat)