Gyoengq beixnuengx Nazsihcuz ranghdieg Byanae Yilungz Yinznanz Swngj, moix bi liggaeuq ndwenngeih cobet cungj gvaq ngoenzciet dwkcaeq hoenghhwd ndeu, heuhguh “ciet Sanhdoj”, dwg vunz Nazsihcuz dwkcaeq boux saenzhenhoh ceiq ak bonj minzcuz—“saenz Sanhdoj”, caemh dwg ngoenzciet minzcuz fapdingh Nazsihcuz.

“Ciet Sanhdoj” dwg daj Hoihmiuh Bwzyoz Mbanjyilungz cienz roengzdaeuj, “Sanhdoj” dwg saenzlingz bonjcawj caeuq saenzhenhoh ceiq ak Nazsihcuz, riuzgangj dwg boux saenzhoenxciengq gwih maxhau、daenj buhgyaphau、daenj mauhdiethau、fwngz gaem fagnangxhau ndeu, ciengzciengz okdaeuj baujhoh gij ancienz vunz Nazsihcuz, vunz Nazsihcuz daj Ciuhdangz couh laeb miz ranzmiuh dwkcaeq. Riuzgangj ciuhgeq miz boux canghdwknyaen ndeu, miz bi he ndwenngeih cobet dwg biyiengz, bae gwnz Byanae Yilungz dwknyaen seiz yawjraen ndaek rinnae geizheih ndeu, couh aemq ndaekrin maranz, byaij daengz gizdieg gvaqlaeng guh miuh haenx seiz, rinnae gig naekcaemq, couh dingz roengzdaeuj yietbaeg, yaep he caiq siengj aemq ndaekrin byaij roen seiz, rinnae cix naek dwk gaex mbouj doengh saek di lo. Gyoengqvunz rox le nyinhnaeuz neix dwg aenndang goengsaenz bienqbaenz, couh youq dieg de guh miuh dwkcaeq, cigdaengz seizneix.

“Ciet Sanhdoj” moix bi banh baez ndeu, moix daengz liggaeuq ndwenngeih cobet ngoenz dwkcaeq “Sanhdoj” neix, gij beksingq ranghdieg neix cungj angqyangz comz youq laj dinbya Byanae Yilungz, guh dwkcaeq “saenz Sanhdoj” hozdung, banh ciengq go eu fwen daengj gak cungj gak yiengh vwnz dij hozdung. Gij gojriuz ndeidingq caeuq gij gingj gyaeundei Byanae Yilungz hungsang doxdaengh doxdak, hawj gyoengqvunz ndaej camgya guh gak cungj hozdung, youh ndaej yawj gingj guh’angq, ndigah ngoenzciet cungj vunz lai vunz daih, sing go sing fwen hwnzngoenz mbouj dingz, nauhyied hoenghhwd dangqmaz.

Liggaeuq ndwenngeih cobet, dieg baihnamz guek raeuz cix daengngoenz ronghcangx mbwn gvengq va hai, dauqcawq loegheu homfwt, engq habngamj gvaq ciet. 1988 nienz, aen ciet ndaej dingh guh ngoenzciet minzcuz conzdungj Nazsihcuz, baenz gak cuz beixnuengx ranghdieg Byanae Yilungz ngoenzciet doxcomz angqyangz yawj gingj ndei seizcin caemhcaez guh- angq ndeu, hawj fungsug conjdungj maenhndei ngoenzciet ndaej daihdaih swnjcienz roengzbae.