Yizcouh Si Gungh’anhgiz Gyauhgingj Dadui boux senhconz minzgingj Liengz Hungzyenz, vihliux guh ndei hong senhconz gyaudoeng, dawz gyaudoeng ancienz cihsiz soengq daengz ranz ginzcung, sawj vunzlai rox daengz gyaudoeng ancienz cihsiz cungyau, de bae baiq canghfwen son de guh fwen eu fwen, de rox eu fwen le couh dawz gyaudoeng ancienz cihsiz bien baenz bonj sawfwen ndeu. Seizneix, Liengz Hungzyenz youq ndaw segih roxnaeuz ndaw yienhciengz senhconz hozdung haenx, de cungj eu fwen daeuj senhconz gyaudoeng ancienz cihsiz, ndaej daengz ginzcung haenhndei.

(Fungz Cozlinz)