Ngaiz vunzlai rox gienh saeh neix le, songde roxnyinh saetnaj dangqmaz, hixnaengz lienz laeuj ngoenzlaeng hix mbouj nyienh gwn, dangq boux byongh hwnz gwih max ma ranz.

Youh miz baez he, Bohhoj heuh mehyah ma ranzdaiq ciq duz vaizdaeg daeuj gunjreih, gunj sat le Bohhoj yien vaiz bae laj raemh ndoj ndit, de aeu goenj cagvaiz cug haeuj mehdin bae couh ansim laepda yietbaeg, lij nanz mbouj nanz beng mbat he ne! Mbouj rox mbouj nyinh ngaiz ninzndaek gvaqbae lo.

Daengngoenz doek ndoi, wngq- dang baenz yien vaiz ma ranz guhcaeuz lo, de baez singj sikhaek ngaiz hwk dwk conh hanh nit: Meh ha! Duzvaiz ngaiz vunz caeg bae lo! Laxlawz bouxcaeg mbouj rox mwhlawz dawz cagvaiz lamh haeuj gofaex bae, yaeuh de cungj nyinhnaeuz duzvaiz lij youq henz ndang ne! Vaizdaeg ngaiz vunz caeg bae aeu yienghmaz daeuj boizdauq ne? Neix mbouj dwg aeu diuzmingh de ha! De lumj duz gaeq ngomq nei youq de fat you.

Bohhoj naemj bae naemj dauq, raen dangqnaj miz aen mbaengq- faexcuk he, doeklaeng naemj ok aen banhfap ndei he……

Mehyah Bohhoj raen de hoeng fwngz ma ranz, goj de cib cingz ngaiz coem duzvaiz lo, hai bak couh ndaq de dwg vunzcuij.

Bohhoj dauqfanj angqvauvau doiq mehyah naeuz:“Yah ha yah, mwngz ndaq loek lo! Hix suenq gou mingh ndei ha! Gangj liux buenq ngoenz bouxde cix nyienh aeu aen mbaengqfaexcuk dijbauj neix vuenh duz vaizdaeg ha! Bouxwnq nyienh aeu song duzvaiz bae vuenh aenmbaengq neix hix mbouj ndaej ne!”

Gangj sat, siujsim dawz aen mbaengqfaexcuk loh dangqnaj meh- yah, youhcaiq saenzmaet siuj sing naeuz:“Gaej yawjsiuj aen mbaengq neix, de dwg yiengh hongdawz damqbauj he ha! Lajnamh dieglawz moek gimngaenz cungj ngaiz de damq ok caez! Mbaetneix raeuz fatcaiz lo!”

Mehyah bonjlaiz couh dwg vunzhuk, vunz naeuz yienghmaz de cungj saenq, Bohhoj geij coenz vah neix hawj de sim’angq raixcaix, haemhde de gietdingh dawz gienh saehndei neix bauq hawj Daxmeh nyi.

Mehyah yamqnduj ok dou, Bohhoj couh yamqlaeng bae riengz. Bohhoj rox mehlwg de dwg ninz caemh rug, couh laeglemx ndoj haeuj laj mbonq yahdaiq bae caeg dingq.

Mehyah naeuz:“Lwgcuij neix aeu daegvaiz vuenh ndaej aen mbaengq damqbauj he, baezlaeng gij gimngaenz raeuz aeu diem ndei cix ndaej bw!”

Yahdaiq damzdingz han naeuz: “Gij gimngaenz raeuz miz di moek youq laj gangraemx、miz di moek youq baksaeuq、miz di moek lajcanz baihrog, gizgiz diem ndaej maenh caez, gou mbouj saenq de damq ndaej ok ne! Gou goj de dwg yaeuh raeuz aeu duzvaiz bae gai ha! Danghnaeuz dwg yienghneix gou couh sousib diuz minghma de cix ndaej!” Gij vah neix ngaiz Bohhoj youq laj mbonq dingq ndaej cingcing cujcuj. De youh lau youh angq, byonghhwnz youh laeglemx ndonj dauq ranz ninz.

Haetlaeng, Mehyah ma ranz raen Bohhoj lij ninz laj moeg, doiq de naeuz: “Mwngz dawz aen mbaengq bae ranz gou sawq damq mbaet he, danghnaeuz dwg yaeuh vunz, ndaek gyaeuj mwngz couh goenq hawj gou!”

Bohhoj angq dwk han naeuz: “Mbouj saenq couh sawqsawq mbat he!”

De baez daengz ranzdaiq, couh daihsing doiq yahdaiq hemq naeuz: “Gwizhoj daeuj damq bauj lo!”

“Aen mbaengq neix hawj gou daeuj coux nyouh lij yiemz caz! Mwngz damq ndaej geijlai couh gvi sat mwngz ba! Danghnaeuz dwg yaeuh vunz, gou beng gij naeng mwngz!” Yahdaiq naeuz.

“Gangj vah suenqsoq! Mbouj ndaej ienhoij bw!” Bohhoj gangj sat couh dawz aen mbaengq okdaeuj youq ndaw ranz rog ranz byaij geij hop, doeklaeng de dingz youq baksaeuq vix naeuz:“Gizneix miz bauj!” Youh byaij daengz henz gangraemx vix naeuz: “Laj gangraemx hix miz bauj!”

Yahdaiq sikhaek ngaiz hwk dwk naj bienq saek liux, ganjgip naeuz dwk:“Mbouj damq lo! Mbouj damq lo! Song yiengh neix cungj soengq hawj mwngz!”

Bohhoj hix roxnyinh siedleix, doiq yahdaiq naeuz:“Song faenh bauj neix gou aeu faenh he ndaej lo!”

Gangj sat youq baksaeuq vat ndaej boemh gimngaenz he angq- vauvau ma ranz lo.(sat)