“Cietganjcax” dwg ngoenzciet conzdungj minzcuz Lizsuzcuz youq henz Dahnu’gyangh haenx ceiq hoenghhwd ndeu, moix bi liggaeuq ndwenngeih cobet hoengh banh, aeu cungj fuengsik simlangh haenqrem caiqlij miz di yungyiemj mizyinx neix daeuj geiqniemh boux yinghyungz daihdaih riuzcienz roengzdaeuj haenx. Danghnaeuz miz vunzhek daj dieggyae daeuj daengz, gyoengq beixnuengx Lizsuzcuz lij aeu gij go foux conzdungj daeuj angq coux.

“Bin laecax, roengz haijfeiz” cungj hozdung fungsug sibgvenq conzdungj ndawbiengz neix, dauq yienh gij cingsaenz naihhaemz gannanz minzcuz diegbya ciengz- seiz bin bya benz dat haenx. Gij laizlig “cietganjcax” miz cungj cienzgangj baenzneix ndeu: Ciuhmingz binghbu sangsuh Vangz Gi souh cauzdingz baijnyaemh daiq bing bae Yinzninz gizdieg Lizsuzcuz comzyouq haenx baijbouh ginh minz lienzfuengz, hoenxbaih vunzdig, soudauq gij diegdeih deng ciemq bae haenx, ndaej daengz beksingq boiqhab, doeklaeng gyaep gij vunzdig ciemq haeujdaeuj haenx deuz. Vih hawj dieg henzguek minz fouq bing ak, de daiq gyoengq bouxcoz Lizsuzcuz lienh bing dwk gienz. Doeklaeng vuengzdaeq dingq vunzvaih luenh ngvab, dwk yw doeg Vangz Gi dai bae. Baenzneix vunz Lizsuzcuz couh aeu aen fuengsik gvaq “cietganjcax” geiqniemh boux cienglingj gyaez guekcoj neix.

“Cietganjcax” youq Yinznanz Swngj Luzsuij、Fuzgung daengj dieg banh ndaej gig hoengh. Ngoenzciet, gyoengq saimbwk lauxnyaeq gwnz ndang daenj gij ndangdaenj moqsagsag minzcuz bonjfaenh, doxcomz youq diegdangz ganjcax. Gwnz diegdangz haem daengj song diuz ganjfaex haemq co raez 20 lai mij haenx, dawz 36 roxnaeuz 72 fag caxraez bakcax yiengq doxhwnj dwk cug youq gwnz ganjfaex, danhfanz dieg miz sam roxnaeuz roek haenx, song fag cax camca baenz yiengh X, gwnz dingj ganjfaex cug miz mbaw geiznding iq caeuq bauqrengh. Bin ganjcax cujyau miz diemjva、diemjcax、loenghcax、couxva、baijdaiz siuyieng dajcuengq、caeq ganjcax、daengjganjfaex、caeq lungz、hwnjcax、utcax、lohdin byaij gyoqfeiz daengj lai bouh, yizsi baenz dauq yenzgwz dangqmaz. Boux bin ganjcax dingzlai dwg bouxcoz bouxcangq, gyoengqde ndang daenj buhhoengz, gwnz gyaeuj hoij baengzhoengz, lohdin. Bin ganjcax cix youq ndaw feizdong dawz foengxoo caeuq sing gyonglaz gyukgyad ndawde hainduj, gyoengq bouxcoz youq ndaw sing angq hemq lohdin diuq haeuj ndaw dong gyoqfeiz, caemhcaiq youq ndaw dong gyoqfeiz diuq bae diuq dauq, neix heuhguh roengz “feiz”、“rag lienhfeiz”; song fwngz lij gop feizmbaw rub hwnj gwnz naj, heuhguh “swiq najfeiz”. Ciengq go diuq foux sat le, gyoengq bouxcoz lienh gvaq haenx lohdin yat hwnj ganjcax, angjdin caij bakcax, song fwngz gaemfuz bakcax, baez mbaek baez mbaek bin doxhwnj, bin daengz dingj ganjfaex diemj dawz bauqrengh, yot ok mbaw geiznding iq bau coh gyoengq vunzlai angq dwk hemqyuyu haenx le youh baez mbaek baez mbaek doenq roengz daengz gwnz namh. Vunzlai cungj humx hwnjbae ndenq cenj laeuj he hawj bouxak gwn. Laj “ganjcax”, feizdong cingq coemhdawz foengxoo, gyoengq saimbwk Lizsuzcuz daenj gij ndangdaenj conzdungj minzcuz bonjfaenh, roq gyong roq laz hopngomx ganjcax ciengq go diuq foux, ciengzmienh hoenghhwd nauhyied. Gyoengq bouxcoz caemh yungh aen gihvei ndei neix doiq fwen ra youx, angqyangz dangqmaz.