Gou gyaez gij va’byaek ranzmbanj, baenz benq baenz benq, henjrwdrwd, gig gyaeundei.

Dahsau seizcin daeuj lo! Cingq dwg seiz ndei youz doengh, dou daengx ranz vunz baema ranzmbanj youz, yawj sausien——va’byaek!

Daengz reih va’byaek, gou sikhaek buet haeuj guengh va- byaek bae, siujsim lili dawz duj va’byaek he hwnjdaeuj sijsaeq yawj: Va dwg saekhenj, miz seiq limq va, lumj aen liengj dajhai he; simva hix dwg saekhenj; ganjva gig unq, baez euj couh raek lo, nyieg daengz dij mbouj ndaej di rengz he; mbawbyaek raezred, loegheu loegheu. Miz di va’byaek cungj hai lo, lumj boux youh boux mingzsingh iq youq gwnz daiz hung ciengqgo diuqfoux; miz di lij yup dwk yaek hai mbouj hai, lumj gyoengq sau iq launyaenq haenx, ndoj youq ndaw geh mbaw; miz di lij baenz dujnoh, lumj baenz aen baenz aen makdauz iq, venj youq gwnz ganjbyaek vad fwngz coh dou, riu coh dou.

Benq henjgim dangqnaj neix, miz raq heiqrang he dongj haeuj naj daeuj, sawj vunz ndaeng sangj uk singj. Cuengq da yawj bae, gwnz bo, ndaw doengh, baenz benq baenz benq, caen dwg aen seiqgyaiq saekhenj he, sawj mwngz gag ngeixnaemj swhgeij dwg mbouj dwg byaij haeuj aen gungdiemh saekhenj he. Naeuz hawj mwngz, mwngz mbouj ndaej youq nanz mbouj ma bw, va’byaek daiq rang lo, youq nanz mwngz rox gyaeujdok bw! Mboujgvaq, miz vunz mbouj lau. Mwngz rox dwg byawz lwi? Mwngz ngiengx gyaeuj yawj couh rox lo, baenz cien baenz fanh duzrwi mbinfwngfwng, gyoengqde youq gwnz va diuqfoux. Laep da hwnjdaeuj, lumjbaenz yawjraen baenz dong cehbyaek cingq caj caq baenz gij youz henjndongq ne!

Gou gyaez va’byaek ranz- mbanj, aenvih de gyaeundei dangqmaz; gou gyaez va’byaek ranzmbanj, aenvih gij gyaeundei de vih ranzmbanj dem saek; gou gyaez va’byaek ranzmbanj, lij dwg aenvih de vih vunzraeuz guh ok gungyen.

(Vangz Yingh)