Mwh mbwn’gvengq seiz, ronghndwen dahcej youq gwnzmbwn saekmwh luenzlulu lumj aen buenzngaenz he, saekmwh vangungj lumj aen ruz iq he, de ndwj aen lwgda ndongqyamyam de, riunyumnyum yawj dou, buenx dou guh fangzhwnz loq.

Ngoenz he gyanghaemh, gou naengh gwnz eij, bomz youq gwnz cuengdaiz yawj ronghndwen, gou yawjraen roeggyaeujmeuz、vumzvauz cungj okdaeuj dang ban. Mui iq ninz ngoenz he le, daengz gyanghaemh youh okdaeuj byaijdoengh lo. Daekdaeq youh hainduj daz gimz lo. Hoeng, fwjndaem cwdangj ronghndwen dahcej lo, mbwn yaepyet bienq dwk laepcupcup, daekdaeq mbouj daz gimz lo, mui iq gip dwk gaeu gyaeu yatyat, aeu gij nyauj soemsat de bae ngauz nyefaex, siengj gyaep fwjndaem deuz.

Mui iq mboujmiz banhfap lo, cijndei bae ra roeggyaeujmeuz boux gingjguenh rox mbin neix. Mui iq naeuz:“Gouz mwngz lo, roeggyaeujmeuz gingjguenh, bae bang dou gyaep fwjndaem deuz ba.” Roeggyaeujmeuz gingjguenh naeuz:“Gou sawqsawq ba!”De gangj le mbin hwnj mbwn bae, yienzhaeuh haenqrengz vad gij fwed de, hoeng fwjndaem mbouj doengh saek di.

Seizneix rumz daxbuz hix daeuj lo, rumz daxbuz naemj: Gyoengqde hix dwg baengz- youx ndei gou, gou lij dwg bae bang gyoengqde mbat he ba. Rumz daxbuz sup gaemz heiq he, youh haenqhengz haiz okdaeuj, fwjndaem sanq lo, daekdaeq youh hainduj daz gij gimz ndeidingq haenx, roeggyaeujmeuz caeuq vumzvauz youh ndaej sim’onj dang ban lo. Ronghndwen dahcej saj gij rongh roengz gwnzdieg daeuj, bang dou ciuq loh, gyanghaemh geijlai gyaeundei ha!

(ngeih nienzgaep Cau Lieng)