Gou miz boux baengzyoux ndei ndeu, coh de heuhguh Lwgraz, coh neix dwg gou an vamingz hawj de.

De byoemgyaeuj ndaemndatndat, naj raezred, lwgda hung de ndongq- lilik, bwnda goengqged, giuzndaeng youh soh youh moj, bak de iqet hoengzfed.

Lwgraz sim gig ndei, hix gig sim’unq.

Geiq ndaej miz baez ndeu, gou caeuq de bae youzdin, dou doq byaij doq gangjgoj. Byaij daengz byongh seiz, dou fatyienh duz roeglaej iqet he, gij ga duzde sieng lo, dou gig sim’in, hoeng gou seng daeuj couh damjsiuj, mbouj gamj gaeb duzde, Lwgraz hix deng roeglaej dot gvaq.

Dou raen roeglaej deng sieng yienghneix, hoeng cix mbouj rox baenzlawz bang de, uk in raixcaix.

Gvaq le yaep ndeu, Lwgraz yawjraen gij ga roeglaej lij miz lwed okdaeuj, de gig siengsim, goq mbouj ndaej dwglau, laep da laep rwz gvaqbae gaeb aeu duz roeglaej haenx, daiq baema ranz. Seizhaenx gou youq henz yawj Lwgraz, mbouj rox de vihmaz miz aen damj neix.

Ma daengz ranz, Lwgraz bae ndaw rug ra ciujcingh caeuq mienzciem okdaeuj, bang roeglaej daz giz sieng, yienzhaeuh caiq aeu baengzsa suek giz sieng de. “Mwngz mbouj lau roeglaej dot mwngz la?” Gou geizheiq dwk cam. “Mwh boux he doengzcingz lingh boux he seiz, guenj mbouj ndaej gijneix lo.”Lwgraz naeuz. Sawqmwh, gou mingzbeg aen dauhleix he: Mwh doengzcingz bouxwnq, gijmaz cungj gaej siengj, daihdamj bae guh.

“Lwgraz, mwngz caen ak!”“Gizgiz, gaej gangj gij neix lo, dou dawz de bae cuengq ba!”“Wng wng.”Doeklaeng, gou caeuq Lwgraz bae cuengq roeglaej lo. Gou yawjyawj roeglaej iq, duzde lumjbaenz naeuz:“Gyoimbaiq song boux sou.”

Ginggvaq gienh saeh neix, gou fatyienh gou caeuq Lwgraz engq doxndei lo.

Lwgraz, baengzyoux ndei gou, mwngz ciengxlwenx cungj dwg baengzyoux ndei gou, mwngz youq ndawsim gou ciengxlwenx dwg buengjyiengh ndei.

(seiq nienzgaep Luz Gizgiz)