Ndwen 2 ngoenz 13, de daiq vunzhong henzndang de bae daengz Swcigih Linzyez Gohyoz Yenzgiusoj, dingq conhgyah gaisau gij cingzgvang gak cungj gofaex majhung caeuq gij yigen doiq loegvaq Guengjsae haenx.

Veiz Gozcingh gaem hong Guengjsae cauh ndoeng loegvaq, lij ndaej Couh Wnhlaiz cungjlij haenh gvaq.

Vahsug naeuz:“Cib bi baenz faex”. Byaij haeuj 80 nienzdaih, Namzningz Si caeuq gij dieghenz de, langhda yawj gvaqbae gizgiz saekheu doh da, mwncupcup, heuswdswd, lai baez ndaej Guekgya Loegvaq Veijyenzvei haenhndei dajciengj, doeklaeng youh ndaej Guekgya Gensezbu ndamingz guh “Aensingz Senhcin Loegvaq Daengx Guek”、“Aensingz Suenfaex Guekgya”. Mbangj canghraiz haenh Namzningz guh “saencingz saekheu”、“aencaw saekheu”、 “faexheu buenq singz laeuz buenq singz”; mbangj gicej ngamq daengz Namzningz haenx, goj haenhdanq: Daengz Namzningz “ndaej yawjraen aen singz heuswdswd ndeu”, “heu doh gwnzbiengz, simsoeng raixcaix!”

Gveilinz、Liujcouh、Vuzcouh sam aen singz neix guh loegvaq, geij boux goengdaeuz faengoeng haenx gaem ndaej gig gaenj, gingciengz diemjcaz dukcoi caeuq sonyinx, yienghceij aensingz bienqvaq gig lai.

Mwh Veiz Gozcingh cawjguanj seizhaenx, caenhguenj ok gvaq gij saeh bi 1958 daih lienh gangdiet buqvaih ndoengfaex yiemzcungq neix, hoeng aenvih doeklaeng Swcigih Dangjveij、Cwngfuj, itcig dangq cauh ndoeng loegvaq Guengjsae dwg gij hongrap canloz youqgaenj fazcanj gozminz ginghci caeuq baujhoh sevei vanzging haenx haenq ca mbouj cuengq, cingzcik yienhda. Ciuq gij swhliu diuhcaz swhyenz ndoengfaex Guengjsae, Guengjsae ngamq gaijfang seizde, dieg miz faex miz 5685 fanh moux, lienghrom ndoengfaex miz 16549 fanh laebfuengmaex, gij lwdhoemq ndoengfaex dwg 16.04%; bi 1974, dieg miz faex gvangq 8266.05 fanh moux, lienghrom ndoengfaex dwg 19261 fanh laeb- fuengmaex, gij lwdhoemq ndoengfaex dwg 23.32%.

Bi 1978 swcigih laebbaenz 20 hopbi seiz, Veiz Gozcingh guh boux donzcangj aen duenzdaibyauj cungh- yangh ndeu ma daengz Guengjsae camgya hozdung angqhoh, youh bin hwnj aen bauqdaiz Lwgminz Gungh- yenz bae ngonz baez dem, seiqhenz Namzningz heuhswdswd, caiq mbouj ndaej raen namhhenj lo. De angq naeuz:“Namzningz Si loegvaq guh ndaej mbouj loek.”

(caengz sat)