Bohhoj lix iq couh guh lwggyax, aenvih ranz hojndoq, baenzranz le youh mbouj miz saek boux lwgnyez, ndigah vunz heuh de guh ‘Bohhoj’. Mboujgvaq Bohhoj ceiq mbouj fug vunz naeuz “Vunz gungz cikeiq noix” coenz vah neix, aenvih de dwg bouxvunz cinglingz youh coengmingz he.

Ranz yahdaiq Bohhoj dwg ranz fouqmiz, caeuq Bohhoj dangq mbanj, yahdaiq dwg yahmaetmi gyae’gyawj mizmingz he. De miz sam dah lwg, aenvih dahdaih dwg vunzhuk cijndei haq hawj Bohhoj; dahngeih caeuq dahsam haq hawj ranzmiz guh bawx; Daegseiq dwg lwgsaidog, aenvih bohmeh ndiepgyaez gvaqbouh, baenz mbauq le lij caengz rox swiq vanj.

Yahmaetmi soqlaiz mbouj dawz lwg gwizhoj neix yawj hwnj gumzda, hai bak haep bak ndaq de dwg ‘lwgcuij’. Vih ok gaemzheiq ndaw aek, Bohhoj hix ra gihvei daeuj sousib Yahmaetmi neix.

Caj bae caj dauq, gihvei daengz lo. Miz baez he, Yahmaetmi youq henz saeuq saz maenz, foedfwd yawjraen Bohhoj daj baihgyae byaij daeuj, gipmuengz daj ndaw saeuq saiq aen maenz okdaeuj diem youq lajeiq, danghyenz lo, gij dinfwngz de vaiq mbouj gvaq lwgda Bohhoj.

Bohhoj baez yamq haeuj douranzsaeuq couh cang guh ndatcingz yienghceij yungh rengz gotdawz yahdaiq, lij unqswnh naeuz dwk: “Meh ha Meh! Baenz nanz mbouj raen ndangdaej mwngz lij ndei ba!”

Yahdaiq ngaiz aen maenz ndat lajeiq nanzsouh daengz raemxda conhmyabmyab, hoeng youh mbouj gamj oksing, caen dwg saej humz mbouj rox gaeu lo, Bohhoj cix roxnyinh biuhhoz dangqmaz, caegcaeg riu dauqndaw.

Caiq miz baez he, Yahmaetmi youq ranz guh ceiz, guh sat ngamq yaek cimz haeuj bak youh myaebraen Bohhoj daj rog byaij daeuj, de sikhaek dawz ndoengj ceiz diem haeuj laj moeg bae, ndaeng Bohhoj dwg ndaeng moednding, gij heiqhom ceiz byawz deuz ndaej gvaq conghndaeng de ne! Bohhoj sikhaek rox Yahmaetmi diem ceiz haeuj gyawz bae. De angq dwk doiq yahdaiq naeuz: “Meh ha, haxbaenh gou youq byonghroen raen duzmax he rouxringx, ndeiyawj raixcaix! Mwngz yawj! Duzde dwg baenzneix ringx ne!” Gangj sat, lij guh lumj lwgnyez nei ringx youq gwnz moeg. Rouxringx sat le lij doiq Yahdaiq naeuz: “Laj moeg dwg miz yienghlawz denz ndaej baenz unq ne!?” Doq gangj doq fan geu moeg, raen ndoengj ceiz ngaiz at myaz liux, gyajcang naeuz:“Hojsik ha! Hojsik ha!” Yahdaiq cix youh heiq youh gip, daej riu cungj mbouj baenz.

Yahdaiq ngaiz sied song baez hawj gwizhoj danghyenz mbouj fug, lwnz daengz de amq heiq gax aek, cungj siengj ra ngoenz daeuj bauqcouz doxdauq.

Ndwenlab lajcieng, Daegseiq aeu yah lo, ngoenzvahcuz haenx song boux lwggwiz fouqmiz dangq boux gwih max dawz huqlaex naek daeuj gingqhoh. Yahdaiq daegdaengq anbaiz songde naengh congzsang daihdangz gwn caeuz, gwnzcongz baij rim noh’aek nohgaeu; Yahmaetmi raen Bohhoj huqlaex mbaeu, anbaiz de youq rog naengh congzdaemq caeuq gyoengq laeujbat caemh gwn, gwnzcongz mbouj dwg nyaujbit nyaujgaeq couh dwg ndokndag, ra gaiq soengq haeux hix nanz ne. Gwn caeuz sat le, Yahmaetmi youh caiq daengq Bohhoj naeuz: “Lajcieng caeg lai, vih fuengz vunz daeuj guhcaeg, mwngz youq lajroq ninz, hix mbouj ndaej ninz gvaqbouh nw!”

Hwnzde song lwggwiz fouqmiz caemh ninz aen mbonq he, Bohhoj hix gienj fan moeg gaeuq he saenzdedded ninz lajroq, ndwenlab mbwn nit Bohhoj baenzlawz ninz ndaej ndaek. Gyanghwnz laeuj sanq gvaq byongh, Bohhoj yied naemj yied hozndat: Yahmaetmi neix dama yawj vunz daemq, yawj gou baenzlawz sousib sou cix ndaej ne!

Byonghhwnz samgeng, Bohhoj laeglemx dawz riengmax doxcug, song duz max vihneix youh dik youh hemq mbouj dingz, nauh dwk gyoengqde mbouj miz banhfap ninz. Yahdaiq youq laj moeg ndaq naeuz: “Lwgcuij neix mwngz mbouj rwz nuk ba! Duz- max baenzneix dik nauh mwngz mbouj dingqnyi? Dawz song duz de faen hai ha!”

Bohhoj han naeuz: “Gou dwg vunzseng haeuj gyawj mbouj ndaej! Hawj bouxcawj de daeuj gek hai cix ndaej ne!”

Song lwggwiz byonghhwnz ngaiz yahdaiq heuh bae gek max gig mbouj cingznyienh. Bohhoj baez raen songde ok rog daeuj yien max, gipmuengz ndonj haeuj ndaw rug bae biengj fan moeg le caiq ok gong nyouh he roengz ndaw mbonq bae, youh aeu moeg hoemq doxdauq. Song lwggwiz byaij dauq raen gwnz mbonq cungj dwg dumz nyouh, cungj laih dwg mwngz nyouh conh doxndaq hwnjdaeuj, boux mbouj nyiengh boux, Yahdaiq youq henz cam naeuz: “Guhmaz baenzneix cauz ne?” Bohhoj daihsing dap naeuz: “Song boux de nyouh conh ndaw mbonq ne!”(caengz sat)