Daj bi 2004 gvaqdaeuj, baez daengz seizcou makgam henjrwg homfwt seiz, Liujcwngz Yen aen yienh “ranzmbanj makgam iq” neix moix gek song bi cungj hoengh banh ciet lijyouz vwnzva makgam, vunz Liujcwngz gaenxgit haenx “aeu makgam comz baengzyoux、aeu makgam cienz cingz、aeu makgam cimh canghhek”, caemhcaiq bwh le “donqngaiz” lai cungj lai yiengh ndeu daeuj angq coux gyoengq bouxhek seiq fueng bet baih, youq song sam ngoenz seizgan ndawde, doenggvaq makgam iq yien sienq gaq giuz, dawz nungzyez、gohgi、vwnzva、lijyouz daengj lai cungj yenzsu gaenjmaed doxlienz, caemhcaiq youq gwnz daizheiq ciet makgam cungfaen baijyienj okdaeuj, hawj gyoengq bouxhek baengzyoux doengzcaez faenyiengj le gij cwngzgoj diemzvan Liuj- cwngz ginghci sevei haenx, hawj gij “feihhom diemzvan” ranzmbanj makgam hawj vunz dauqngeix mbouj liux mbouj caenh.

Ngoenzciet banh miz lai cungj lai yiengh hozdung, cujyau miz ngoenz gaihmu cunghyi vanjvei、ngoenzhaw gohgi、“fungcingz Liujcwngz” daegsaek lijyouz、dox- gaiq ndei mizmingz ndaem ciengx gyagoeng cauxguh daengj doigawj hozdung、aenhoih doigawj cimh canghhek roengzngaenz hangh- moeg、dwk lamzgiuz doxdax daengj, hawj vunzlai comz bae yawj caemh ndaej camgya haeujbae, angqyangz simsangj.

Daj 1981 nienz go daih’it “makgam Nanzfungh” ndaem roengz suenmak Liujcwngz le, aen yienh neix makgam dajndaem bi beij bi lai, dangqnaj daengx yienh ndaem makgam iq mauhgvaq 18 fanh moux, bi sou ndaej makgam 25 fanh dun, souhaeuj mauhgvaq 7.5 ik maenz, ndaej saedyienh nungzminz bingzyaenz demsou mauhgvaq 2200 maenz; ndaw yienh Dabuj Cin Mbanjvuhgyah、Dunghcenz Cin Mbanjgujlu、Majsanh Yangh Mbanjhwngzsanh daengj mbanj lienzbenq dajndaem makgam iq cien moux doxhwnj, hawj makgam iq baenz le aen yienh neix aen canjyez hung riengzlaeng oijdangz ndeu, ndaej heuhguh “monzhong diemzvan”, Liuzcwngz caemh baenzneix ndaej heuhguh le “ranzmbanj makgam iq”, rengzrwd coicaenh le aen yienh neix lijyouz daengj gak hangh hong hoengh guh baenaj.