Haetromh，gou ngamq byaij haeuj gyausiz，couh miz bang hagseng ndeu yiengq gou byaij daeuj，caemhcaiq caj mbouj gib dwk naeuz：“Lauxsae，Canfungh youh deng gaeu faen lo，de ngoenzneix youq ndaw hagdangz gveng ceij.” Gangj sat，bang hagseng neix gig ndatheiq. Dingqnyi hagseng gangj neix, gou ndawsim hix gig ndatheiq caeuq fouz naihhoz. Yienznaeuz ndawsim yienghneix siengj，hoeng lij dwg unqswnh dwk cam canfungh：“Canfungh，mwngz vihmaz youh gveng ceij lo?” De ngiengx gyaeuj hwnjdaeuj，gwnz naj mbouj hoengz saek di，yaep da dwk naeuz：“Gou dwg mbouj siujsim.” Caen dahraix，caeuq doenghbaez han doxdoengz，aen ban gou deng gaeu faen haujlai cungj dwg aenvih Canfungh，gou naeuz gaeuq lai de，hix ciengzciengz caeuq bohmeh de lienzhaeh gangj saeh neix，hoeng mbouj raen gaij saek di，de vanzlij dwg boux hagseng ceiq hawj gou gyaeujdot ndeu. Gij vwndiz de itcig heux ndaw uk gou，yienghneix roengzbae caen mbouj ndaej，sien mbouj gangj de boux dog hag mbouj ndei，lij yingjyangj banhfungh ban gou，gou mbouj ndaej youzcaih de lo，gou gietdingh caiq yungh lingh cungj banhfap he，son de gaij ndei bae.

Ngoenz daihngeih, ngamq hwnj- dangz, gou raen de naengh ndaej gig cingq，couh haenh de：“Canfungh ngoenzneix caen cingsaenz，naengh ndaej caen baekgywggywg ha!” Ciepdwk gou youh doiq de naeuz：“Gou maqmuengh mwngz hwnjdangz seiz nyinhcaen dingq gangj，cizgiz hoizdap vwndiz， ceng’aeu hawj swhgeij gya faen.” Gou youq ndaw ban laeb aen “hingzveiz gijliz” ndeu，baengzgawq gij biujyienh ndaw godangz daeuj gya faen gemj faen. De dingq le ngaekngaek gyaeuj. Daengx dangz go de cungj gig nyinhcaen dingq, lij haengj hoizdap vwndiz，gya song faen hawj de. De angq dangqmaz，ndaw lwgda loh ok gij rongh angqyangz daeuj.

Doeklaeng，gou cijaeu yawjraen de miz di cinbu，couh haenqrengz biujyangz de. Gou fatyienh， de caiq hix mbouj lumj doenghbaez yienghhaenx luenh guh lo，ndawsim gou angq raixcaix. Youq guh danhyenz gaujsi seiz，de gawqyienz gauj ndaej 90 faen. Fat gaujgienj seiz，de daegbied angq，lij bae cam doengzhag，diuz daez neix loek youq gizlawz，baenzlawz guh, youh heuh gou gangj hawj de dingq. Daj gij biujyienh neix ndaej yawj ok，de cingq roengzrengz gaijbienq swhgeij，de siengj baenz boux hagseng ndei ciengzseiz ndaej daengz lauxsae haenhndei ndeu. Gou yawj ok sim de，couh youq dangqnaj daengx ban doengzhag haenhndei de, naeuz de cinbu gig vaiq. Yienghneix, de mboujdan hagsib miz cinbu，lij doiq hagsib mizyinx lo. Ngoenzhaenx cuengqhag seiz，gou dawz gij biujyienh de lwnh hawj bohmeh de nyi, caemhcaiq maqmuengh gyoengqde itdingh aeu boiqhab gou itheij gujli de，hawj de roengzrengz doeg saw, cienfanh mbouj ndaej soengheiq， mbouj ndaej ndaengmoj.

Gij saeh son Canfungh doengz- hag, sawj gou rox daengz, hagseng guh loek le guh boux lauxsae mbouj ndaej cij rox ndaq de, aeu bang de gaij loek, aeu haengj fatyienh gij ndei hagseng, lai biujyangz noix bihbingz, gujli hagseng, hawj hagseng saenqsim. Hix hawj gou gamjsouh daengz gij hong lauxsae couh lumj monz yisuz ndeu, mizseiz caen roxnyinh caeuq hagseng itheij lumjbaenz cingq daeuq geiqmaeuz daeuq damjliengh ityiengh，gig miz yinxdaeuz.