Moix bi liggaeuq ndwenngux ngeihbet, Hawgeq Cunghdu Luzcai Yen gih raeuz cungj banh hoihmiuh hoenghhwd, gyoengq vunzlai henzgyawj nem gyoengq hekyouz gak dieg, caemh angqvauvau dwk bae nauh hoihmiuh、gwn “ngaizdoxcaeuq”, nauhyied dangqmaz.

Hawgeq Cunghdu youq gwnz lizsij dwg gih raeuz gij hawgeq mizmingz ndawde aen ndeu, gij ranzgeq gwnzhaw youq seiz Ciuhcingh geizgyang hwnjguh haenx cix louz ndaej haemq lai haemq ndei, seizneix lij ce miz ranzgaicawx gaeuq、diemqhek gaeuq daengj, Miuhvujmyau、Cunghdu Fujminzdingh、Cunghdu Canhyivei daengj miuhgeq ranzgeq henhoh ndaej gig ndei, yienh’ok gij yiengh gaeuq lizsij gyaenanz aen hawgeq neix. Riuz naeuz goenghaksingz Cunghdu ndiepgyaez lwgminz goq daengxbuenz, guhsaeh goengcingq vunzlai haengjgyaez. Seiz Gvanghsi cibbi, Dienhdaihoz Gingsingz deng feizcoemh, goenghaksingz Cunghdu daiq vunz bae ndaep feiz; vuengzdaeq Gvanghsi niemh haksingz Cunghdu ndaep feiz miz goeng, couh soengq gep baizfaex ndeu hawj de, seizneix lij louz cuengq youq ndaw miuh. Vunzlai Cunghdu itcig dawz haksingz dangq goengsaenz baujyouh bingzan vuenghndei ndeu, caep aen miuh he daeuj ciengxlwenx geiqniemh de, lij dingh youq moix bi liggaeuq ndwenngux ngeihbet banh geiqniemh hozdung, gvaqlaeng couh bienqbaenz le aen ngoenzciet ndawbiengz Cunghdu ceiq hoenghhwd ndeu. Hoihmiuh geizgan, gyoengq hekyouz caemh ndaej haeuj miuhhaksingz siu yieng caeqbaiq, mbaenj fuk gouz caiz gouz bingzan.

Haet ngoenzciet lingzseiz, baihnaj Miuhvujmyau couh vunz lai vunz daih gyukgyadgyad. Gij doih caeqbaiq ndaw Cunghdu Cin gak diuzgai nem gij mbanj henzgyawj haenx doxriengz doxcaeh dwk doxlwnz caeqbaiq. Gyoengq vunz gingz yienglaux, ram baenz duz mou caeuq yiengz, roq gyong roq laz, foux lungz foux saeceij, doihyanghgoh、doihgyongvang riengzlaeng doq diuq foux doq ciengq go, ciengzmienh nauhyied dangqmaz, cigdaengz banhaet bet gouj diemj cung hozdung caeqbaiq cij guhsat. Banhaet cib diemj cung, aen hozdung ram goenghaksingz youzgai couh hainduj lo, baihnaj miz gyoengq binghak hairoen, doih duzmbaj、ruzhawq、maxfaex、ramvunzheiq cix riengzlaeng dwk foedfoed nanghnangh byaij baenaj. Moix byaij gvaq diuz gai ndeu aen mbanj ndeu, doih foux lungz foux saeceiq caeuq doih yanghgoh gyong’vang dieg neix couh ciep riengz hwnjdaeuj. Riengzdwk byaij gai haeuj mbanj yied daeuj yied lai, aen doih youzbyaij caemh yied ciep yied raez, daj gyaeuj yawj mbouj raen rieng, ciengzmienh hungloet raixcaix. Youzgai sat le, gyoengq vunz gak diuzgai couh doxcomz dwk gwn donq “ngaizcaeuq” ndeu, caemh heuhguh “ngaizdoxcaeuq”, dangq donq “ngaiz bak ranz” seizneix. Gyoengq vunz gwnzgai caeuq ganbu dangdieg nem gyoengq hekyouz caemh naengh henz daiz, gwn laeuj gangjgoj, doxhuz angqyangz.

Hoihmiuh moix bi cungj banh 3~10 ngoenz, cawz hozdung caeqbaiq、ram goenghaksingz youzgai le, lij banh miz gij hozdung fungsug ndawbiengz conzdungj lumjbaenz ciengj bauqva dued vengqciengj、yienj Heiqgvei、dwkgienz loengh cazsaj, seizneix lij demgya banh miz diuq foux gyong’vang、yanghgoh, eu fwen doiq fwen, cuengq daengdah、baijgai doxgaiq fwngzguh ndawbiengz caeuq baijgai gijgwn haekfeih daegsaek dangdieg daengj hozdung dem, hawj hozdung hoihmiuh engq lai cungj lai yiengh.