Caez boq loxlez roq aennyenz, song henz Dahhoengz angq caemzgvej. Moix bi ndaw ndwencieng, gyoengq beixnuengx Bouxcuengh ranghdieg Dahhoengz baihsaebaek gih raeuz cungj angqyangz hoenghhwd dwk gvaq “ciet caemzgvej”, gyoengq vunz caeqbaiq duzgvej、diuq foux caemzgvej, guh gak cungj gak yiengh vwnz dij hozdung, mbaenj bi moq fwn yinz rumz dingh, gohaeux gogo fungsou. Gyoengq vunzmbanj henzgyawj nem haujlai hekyouz cungj caenx bae humx yawj, gwnz bo, ndaw doenghnaz sing go sing fwen sing hemq sing riu caeuq sing bekfwngz doxgyaux doxcab, yienh- ciengz nauhyied dangqmaz.

Denhngoz Yen Luzbaiz Cin Nazdung Cunh dwg gizdieg fathwnj diuq foux caemzgvej, doengh bi neix daeuj gyoengq vunzmbanj moix bi ndwencieng cungj gag doxiu dwk banh ciet vwnzva fungsug ndaw- biengz caemzgvej. Haet ngoenzciet, gyoengq saimbwk lauxnyaeq ndaw mbanj cungj cangndang moqsup, daiq gij bit gaeq bya noh、faengx daengj gak cungj doxgaiq haemh gonq bwh ndei haenx bae dajcuengq, daj gak aen mbanj comz daengz dieghoengq doenghnaz baihnaj dozdaengz duzgvej naj laeuz cunhveij, dajcuengq caeq duzgvej、diuq foux caemzgvej, mbaenj bi moq yienghyiengh swnhsim dajciengx maj vaiq dajndaem fungsou. Gyoengq vunzmbanj yanghcin henzgyawj caeuq gij hek daj Nanzdanh、 Dunghlanz daengj yienh daeuj haenx, ranz ngamq rongh couh caenx haeuj Nazdung Cunh, dawz diegdangz biujyienj humx dwk caengz dem caengz, youq yienh- ciengz yawjngonz caeq duzgvej, boq loxlez, roq nyenz, eu fwen, diuq foux caemzgvej, yienj foux rauq naz cae reih、dwkbya rauz gungq caeuq doz mae daemj baengz daengj fungsug ndawbiengz Bouxcuengh gag miz neix, baenz dangdieg aen binjbaiz vwnzva daegsaek minzcuz okmingz ndeu.

“Ciet caemzgvej” caemh heuhguh “ciet yahgvej”、 “ciet fwen’gvej”， ciuq sawgeq geiq naeuz, “ciet caemzgvej Bouxcuengh” dwg daj hong guh reih guh naz ciuhgeq ndaej daeuj, seizhaenx vunz ciuhgeq ndaemnaz seiz, roxyiuj duzgvej ngoenznaengz swenjheuh、 haeujok cingzgvang caeuq mbwn rongh doek fwn gvanhaeh lai raeuh, ndigah couh laihnaeuz bouxgaemguenj ok rumz doek fwn haenx mbouj dwg lungzvuengz, dauq dwg duzgvej saenzmbwk. Ndigah gyoengq vunz couh vihle seiz mbwnrengx gouz fwn, seiz raemxdumh gouz mbwn- rongh, hainduj baiq duzgvej, banh ciet caemzgvej, aen fungsug neix youq ndaw gyaiq Dunghlanz Yen caiq daengz ranghdieg Nazdung Cunh hwng dangqmaz, itcig riuz daengz seizneix, baenz aen ciet hoengh youqgaenj Bouxcuengh rangh Dahhoengz ndeu, moix bi liggaeuq ndwencieng coit daengz ndwenngeih ndawco hoengh banh. Ngoenzciet yaek banh miz ra gvej、caeq gvej、hauq gvej、cangq gvej caeuq doiq fwen、roq nyenz doxdax、diuq fouxmauhngeg daengj haujlai hozdung.

Song bi neix gvaqdaeuj, Denhngoz、Dunghlanz caeuq Nanzdanh sam yienh doxgap yiengq baihgwnz bauq “ciet caemzgvej Bouxcuengh”, gaenq ndaej lied haeuj gaep guekgya feihvuzciz vwnzva yizcanj baujhoh mingzloeg; Denhngoz Yen lij gag bauq le “foux caemzgvej Bouxcuengh”, gaenq ndaej lied haeuj gaep swcigih feihvuzciz vwnzva yizcanj baujhoh mingzloeg.