Bi’gvaq, Denhdwngj Yen gya- rengz guh hong hawj doenghboux mehmbwk saujsu minzcuz ndaej youq dangdieg guhhong cauxhong, hawj ndaw yienh gyawj 5000 boux mehmbwk ndaej youq gyawj ranz hwnjban guhhong, ndawde doengh- boux gag cauxhong de miz 625 boux.

Bi’gvaq, Denhdwngj Yen miz 13 fanh lai vunz okrog bae guh hong, doenghboux mehmbwk louz youq ranz de miz 3.6 fanh vunz, ciemq daengx yienh cungjsoq 54.8%. Vih bangcoengh doenghboux mehmbwk neix youq dangdieg hwnjban, aen yienh neix guh ndei hong dazyinx vunz daeuj roengzcienz. Bi’gvaq, doenghgij giyez haeuj Denhdwngj Gunghyez Yenzgih de gungh miz 25 aen. Neix couh miz haujlai hong hawj dangdieg doenghboux mehmbwk youq ranz de bae guh. Doengzseiz, Denhdwngj Yen laeb 9 aen“mehmbwk doegsaw hezvei”, caemhcaiq cingj gak loih lauxhangz daeuj dangciengz sonyinx, hawj gyoengqde lai rox lai ak baengh gohgi baenzfouq. Bi’gvaq, aen yienh neix gaenq cujciz gaihcanj lajmbanj saedyungh gisuz beizyinbanh 26 geiz, miz 8000 lai boux nungzminz camgya. Linghvaih, Denhdwngj Yen lij cienmonz comz doenghboux mehmbwk youq ranz de okrog bae ngonzyawj hagsib, hawj gyoengqde caen hag ndaej gisuz baenzlawz dajciengx roeggap noh、noufaexcuk daengj nem dajndaem makit、lwgbiek daengj. Caiq miz ne, Denhdwngj Yen laeb 6 aen“mehmbwk doxcoengh hezvei”, hawj gyoengqde doxcoengh cauxhong、doxbang guhhong, comz rengz ok geiq maeuz, “guhndaek” cauxhong.

Cimdoiq doenghboux mehmbwk youq ranz de mbouj miz cienzgoek cauxhong, Denhdwngj Yen doenggvaq cuengq gij daigvanj iq boujdiep leihsik de, haenqrengz bang gyoengq- de aeu cienzgoek cauxhong. Bi’gvaq, Denhdwngj Yen gyoepsuenq fat gij daigvanj iq boujdiep leihsik de 1167.2 fanh maenz, 600 lai boux mehmbwk lajmbanj ndaej coengh.

(Liengz Cwngzfuj)