Bauq yiengj daenh bya ndiu, lungz foux yienghyiengh hoengh. Moix bi liggaeuq ndwencieng cib’it, yienhsingz Binhyangz cungj banh loengh lungzbauq hozdung, ndaej heuhguh ciet lungzbauq. Haemh haenx, ndaw yienhsingz Binhyangz gai hung hongh iq vunz lai vunz daih, bogfeiz ronghyab, gyonglaz gyuk- gyad, lungzbauq fangienj, sing bauqrengh yiengj mbouj dingz, sing hemq raq riengz raq, daengx aen yienhsingz angqyangz nauhyied dangqmaz.

Lungzbauq Binhyangz lizsij gyaenanz, goek laeg rag raez, ciuq gaisau, youq Ciuhbwzsung Nungz Cigauh gijyi seiz, Samlienz Segih dwg gizdieg Binhyangzfuj, seiz- haenx binghak caeuq binggijyi couh youq henzgyawj hoenxciengq, hoeng mbouj faen sawhingz. Ndigah binghak couh siengj ok aen banhfap ndeu: Youq ngoenz ndwencieng cib- it, daengx singz guh lungzbauq venj daengloengz, gyoengq vunz daez- gonq gvaq cieng cibngux hwnjdaeuj, ndaw singz dauqcawq angqyangz vuenyungz. Nungz Cigauh dingqnyi siusik le cix soengheiq lo, laihnaeuz binghak gvaq ciet mbouj caiq daeuj hoenx, ndigah cuengqsim ninz ndaekngaeu, doeklaeng binghak sawqmwh hoenx daeuj deng dwkbaih lo. Gvaqlaeng, gyoengq vunz dangdieg couh moix bi cungj dinghgeiz gvaq ciet lungzbauq, cigdaengz seizneix.

Lungzbauq Binhyangz haenq- hwd angqyangz, miz cungj gyaeundei rengzak ndeu. Haemh cib’it caet diemj cung, gak duz lungzbauq cungj doxcaeh dwk bae miuhgeq lungzbauq roxnaeuz gij miuh diuz gai wnq hairongh, youz goengsae roxnaeuz goenglaux miz goengdaek aeu heuj haeb byoengq aenrouj gaeqboux, yub aeu lwedroujgaeq bae diemj dalungz hairongh, duzlungzbauq sikhaek couh lixdauq lo, seizneix bauqrengh yiengj bibi baba, lungzbauq yat hwnj maeuq roengz, foux lungzbauq couh cingqsik hainduj lo. Bouxfouxlungz lohgengz haenq foux, gwnz gyaeuj daenj aen mauh lumj yiengh binghak Ciuhcingh aeu duk san baenz mad saek ndaem ndeu, cawlungz、baizlungz、gyonglaz daengj youq baihnaj hai roen, bouxdawzdaeng caeuq doihhenlungz riengzlaeng dwk foedfoed nanghnangh byaij baenaj. Gij ranz youq song henz gai lungzbauq foux gvaqbae haenx, ranzranz siuyieng coux lungz, diemj lab dem rongh, lij bwh haujlai bauq diemj le “caqlungz”, dem le haujlai angqyangz, gyoengq vunz humx yawj haenx, mbangj lij mbeihung dwk ndonj con gvaq laj dungx lungzbauq, ciengj ciemz saek geu mumhlungz, doeklaeng lij camgya ciengj aeu cawlungz dem, eiqsei dwg mbaenj bi moq seizheiq ndei, vunz ranz bingzan swnhleih, vunzlaux souh- yienz, yienghyiengh habhoz. Lungz- bauq foux sat le, gyoengq vunz couh dawz duzlungzbauq deng bauqrengh caq dwk caenh lw goetgyaq haenx diemj feiz coemh bae, heuhguh soengq lungz hwnjmbwn.

Doenghbi neix daeuj, Binh- yangz Yen moix bi cawz cingsim banh ndei foux lungzbauq hozdung le, lij yawjnaek cauxlaeb binjbaiz vwnzva lungzbauq, dawz gaxgonq moix bi cij banh ngoenz ndeu gaij baenz banh sam ngoenz, lij banh miz lungzbauq vwnzyi vanjvei, foux lungzbauq doxdax, byaij gyaqsang baij hoihdaeng daengj hozdung dem, hawj hozdung ndwencieng engq lai cungj lai yiengh!