Doengzbi ndwen 4 ngoenz 8, de dingq Namzningz Si cangzvu fusicangj Yenj Hungzconh gyoeblwnh gij cingzgvang loegvaq le, doiq gij vwndiz songhenz goengloh loegvaq diegsingz Namzningz doeng coh diegrog haenx daezok yigen. De lai baez caeuq boux fusicangj neix doq yawj goengloh, doq daengq hong. Youq gwnz goengloh doeng coh Ciengzfeihgih Vuzhih, de naeuz: “Songhenz gak ndaem 12 hangz faex, hangz liz hangz aeu lumj bouxbing baizdoih nei caezcupcup, mbangj dieg saedcaih hoj guh haenx cix habdangq gemjnoix hangzsoq.”

Miz baez ndeu, Veiz Gozcingh bin hwnj aen bauqdaiz Yinzminz Gunghyenz bae, yawj doh seiqhenz, haujlai bya ndoi vanzlij ndoqndangndang, namhhenj doh da. De doiq boux dinghcangj linzyezdingh Yangz Yungzfeih naeuz: “Caj daengz swcigih laebbaenz 20 le, daj gizneix yawj okbae caiq mbouj dwg ndoifwz byandoq doh da cix ndei lo!” Yangz Yungzfeih gig rox gij simcingz Veiz Gozcingh gig muengh loegvaq Guengjsae haenx, naeuz:“Gozcingh dungzci, gij bumwnz hongndoeng raeuz itdingh roengzrengz guh hong ndei bae, caenhvaiq siumied gij ndoifwz neix.”

De doiq gij hong loegvaq songhenz diuzroen Gemhgauhfungh Roen Yunghvuj daengz Yienh Vujmingz haenx, gig mbouj habhoz. Iugouz Yangz Yungzfeih gyoebcomz cujguhhong, caeuq Yienh Vujmingz doengzcaez gaem hong loeggvaq byafwz dieg yienhsingz, caemhcaiq guh aen Diegndoengfaex Dwngzsiengz, gaem hong ndaem faex cauh ndoeng Gemhgauhfungh daengz yienhsingz haenx. De lij caeuq Veiz Cunzsuz、Yangz Yungzfeih lai baez hwnj Byacwx bae ngonzcaz, gietdingh youz linzyezdingh roengzngaenz, gyauh- dunghdingh sezgi hengzguh, hwnj diuz Goengloh Byacwx, caemhcaiq caenndang ciucomz gij suhgi yenveij Vujmingz、Majsanh、Sanglinz、Binhyangz daengj yienh haenx, ngeix- yaeng gij vwndiz mizgven baujhoh ndoengfaex Byacwx haenx.

(caengz sat)