Youq Guengjsae Minzcuz Dayoz hagsib beizyin haj ngoenz, ngoenz byaij henz Sienghswhhuz geij baez, hawj gou caeuq aen huz neix ‘sugnaj’ hwnjdaeuj, ndaejhoengq gou cungj maij riengz diuz roenheuxhuz menh byaij cix rox gvaqyinx. Ngoenzneix gou foedfwd siengjdaengz, baenz sij bienq faenzcieng ndeu daeuj danq aen huz gyaeundei youh daegbied neix.

Sienghswhhuz, geiq ndaej mwh gou lij youq Vujmingz doegsaw, ngoenz ndeu yamq haeuj neix daeuj ra baengzyoux guhcaemz, cix baez daih- it raen gij yienghsiengq mwngz, hix rox mwngz miz aen coh ndei dingq ndeu — Sienghswhhuz. Dingqnyi miz vunz lwnh mwngz dwg yienghneix daeuj: Gaxgonq diegneix dwg diegfwz rij laeg ndeu, codaeuz 50 nienzdaih mwh ngamq laebguh aen dayoz neix, dwg lauxsae dazyinx 130 lai boux Cuengh、Myauz、Yauz、Dung、Gingh daengj minzcuz hagseng mbouj lau sinhoj, yungh gvak vat mbaq rap dawz mwngz laeb hwnjdaeuj. Geij bi nduj mwngz lij caengz miz mingzcoh ne! Doeklaeng bouxsijsei mizmingz Se Gyozcaih haeuj neix daeuj gaujcaz, raen yiengh mwngz baenzneix gyaeundei, caemhcaiq henz maj miz golimz le, lingzganj daeuj le aeu ‘Sienghswhhuz’ aen coh neix daeuj an hawj mwngz. Gou roxnaj, daj ngoenz miz mwngz hwnj, dieg neix bienqbaenz dieg ok boux gwzming ganbu Guengjsae ndeu. 60 lai bi fwnfwn rumzrumz gvaqdaeuj, gaenq miz baenz cien gvaq fanh bouxcoz daj Guengjsae gak dieg comz daeuj henz ndang mwngz hag cihsiz gvaq. Gak cuz beixnuengx youq neix doxndiep doxgyaez, caezsim caux aen ranz hung minzcuz doxgiet Guengjsae raeuz. Gyoengqde youq neix yamq haeuj ndawbiengz, vih coicaenh ginghci vwnzva fazcanj Guengjsae guh ok gungyen hungloek.

Sienghswhhuz, miz mwngz daeuj nyinhcumx, ndoeng faexge(faexcoengz) Gvangjsih Minzcuz Dayoz cix bienq ndaej baenzneix sanggywg mwncup, doengh go seiqhenz mwngz cix rox daengx bi seiq geiq cungj dwg heuyauyau. Ndonj gvaq laj faex hopheux mwngz byaij, cazndoek、 cazgyoij、faexreiz hawj dieg neix dem yiengh gingjsaek baihnamz. Byaij daengz Ndoiseiq ndwn youq gwnz giuzrumzfwn, mwngz itdingh danqhaenh gij dinfwngz caux giuz gyoengq beixnuengx Dungcuz. Hopheux gvaq dangqnaj Vaigozyij Yozyen, roxnyinh mwngz hawj doengh gij ranzgaeusoem de engq miz yiengh funghcingz Dunghnanzya.

Naengh youq ndaw ranzdingz henz mwngz, yawjngonz gingj gyaeu seiqhenz dwg gienh saeh cwxcaih simsangj ndeu. Sienghswhhuz, gizsaed mwngz youq neix mbouj rox gadog, aenvih gyoengq vunzcoz ceiq maij comzyouq henz mwngz gangjgoj, maij fwngz gaem fwngz youq henz mwngz damzyoux ne! Mwngz mbouj dwg aen daemzraemxdai ndeu, aenvih rox miz song doih mbauqcoz youq gyangrungj mwngz doxdax vad ruzlungz, guh hawj mwngz gienj hwnj caengzcaengz raemxlangh. Mwngz dwg aen huz ceiq miz fukheiq ndeu, ndaej daujingj doengh gij ngaeuzvunz mbouj caemh aen minzcuz.

Sienghswhhuz, ngoenzneix mwngz bienq ndaej baenzneix gyaeu- ndei maez vunz, dwg baengh gyoengq gak cuz beixnuengx daih riengz daih caezsim daeuj ganqhoh. Mboujgvaq, mwngz hix gig roxyiuj yungh gij mwn hoeng gyaeundei daeuj gyo- mbaiq gyoengqde. Mwngz mbouj lumz aencoh swhgeij dwg boux vunzsei an hawj, dawz gij lingzganj sij faenzcieng daeuj soengq hawj vunz, coi ok aen Vwnzyozse Sienghswhhuz, coi ok bang cozgyah Sienghswhhuz, hawj gyoengqde ndaej okmingz lajbiengz. Yienznaeuz Veimingzhuz caeuq mwngz caemh deng liedhaeuj “Cib aen huz ceiq gyaeundei ndaw dayoz daengx guek”, hoeng Veimingzhuz seizdoeng bienq ndaej caem- dinghwgrwg, de mbouj lumj mwngz nei daengx bi seiqhenz cungj dwg saekheu, daengx bi raemx haeuj raemx ok mbouj rox duenh; de mbouj lumj mwngz nei seizdoeng lij miz vaswjgingh angjhai youq henz.

Sienghswhhuz, dwg mwngz cang gyaeu Guengjsae Minzcuz Dayoz, hawj de ngoenzneix yinxndaej doengh bouxcoz Dunghnanzya daengz neix hag vwnzva Cungguek, hawj gizneix bienqbaenz aen gyauhliuz bingzdaiz gozci ndeu, coicaenh ginghci mouyi caeuq hozbingz saehnieb guek raeuz fazcanj baenaj.

Sienghswhhuz, gaxgonq mwngz cij ngamq dwg aen huzraemx gig bingzciengz ndeu, hawj vunz youzlangh yawjngonz; seizneix lizsij youh soengq hawj mwngz cungj hong moq ndeu, de baugvat yiengh gauhdonh vwnzva、 baugvat yiengh gozci gyauhliuz、baugvat yiengh canjnieb moqsag……

Sienghswhhuz, mwngz lumj duzlungz nei bomz youq dieg Guengjsae, hawj gij beksingq de daiq daeuj maqmuengh caeuq fukheiq; mwngz hawj Dadi Feihgoh caeuq aen Lundanz Cungguek—Dunghmungz dem lai funghcaij, gou danqhaenh mwngz!