Hwngzyen miz gij mingzdaeuz ndei “mbanjranz vamaedlaeh Cungguek”、“Diegndei Vamaedlaeh Cungguek”, dwg giz comz ndaem govamaedlaeh caeuq cazva gyagoeng daengx guek caiqlij daengx biengz ceiq hung ndeu. Doenghbi neix daeuj, Hwngzyen hopheux aen cawjdaez “guh ndei·ok biengz” neix, gonqlaeng laebbaenz le aen Cungsim Gaicawx Cazvamaedlaeh Cungguek、Cungsim Niemhyawj Gamduk Cizlieng Huqgai Va(caz)maedlaeh Cungguek caeuq Suenhung Vamaedlaeh Cunghvaz, gaenxgit cauxguh aen bingzdaiz doxgap caeuq fazcanj va(caz)maedlaeh Cungguek-Dunghmungz daengj “haj aen cungsim aen bingzdaiz ndeu”, hawj hong ndaem govamaedlaeh guh cazvamaedlaeh guh ndaej engq ndei vunzbiengz engq maij. Daj bi 2000 daeuj, Hwngzyen gaenq banh baenz bet gaiq daengx guek va(caz)maedlaeh gyauhyivei、seiq gaiq Ciet Vwnzva Vamaedlaeh Cungguek, bi 2011, aen ciet neix aeundaej hangh ciengj “Cungguek cib daih cietgingq ceiq miz gozci yingjyangjliz”.

Hwngzyen youq baihdoengnamz gih raeuz, miz Cuengh、Gun、Myauz、Yauz daengj 15 aen minzcuz gungh 120 lai fanh vunz. Vamaedlaeh dwg aen siengcwngh Hwngzyen, daj Ciuhmingz gvaqdaeuj gaenq miz 400 lai bi ndaemganq lizsij, seizneix Hwngzcouh、Yauyij、Majlingj daengj yanghcin cungj lienzbenq baenz doengh ndaemganq, caiqlij dujva hung, saek va hausak, homva rangrwd, canjlieng lai, seiz haiva nanz, dwg vamaedlaeh ndawde ceiq ndei. Dangqnaj, daengx yienh gaenq miz 6.8 fanh ranz 30 lai fanh vunz guh hong ndaemganq gova, govamaedlaeh ndaem miz 10 fanh moux, gaenq ndaej saedyienh fouz goenghaih ndaemganq, moix bi sou ndaej vamoq 8 fanh dun、siugai souhaeuj 8 ik maenz; miz cazva gyagoeng giyez 150 aen, moix bi gyagoeng cazva 6 fanh lai dun, souhaeuj 20 lai ik maenz, vamaedlaeh canjlieng caeuq cazva canjlieng ciemq daengx guek cungjsoq 80% doxhwnj, ciemq seiqgyaiq cungjcanjlieng 60%, gaenq baenz daengx guek aen gihdi ndaemganq govamaedlaeh caeuq guh cazva ceiq hung ndeu. Daengx yienh miz 13 aen binjbaiz cazvamaedlaeh, mbangj gonqlaeng aeundaej Guengj- sae mingzbaiz canjbinj cwnghhau, mbangj youq daengx guek caiqlij daengx biengz mbawcaz bingzbeij doxdax ndawde aeundaej haujlai daihciengj dauqma.

Ciet vwnzva vamaedlaeh banh ndaej hoenghhwd, moix bi cungj miz gij lauxbanj oepguh caeuq siugai mbawcaz daengx guek gak dieg haenx、bouxlauxhangz mbawcaz caeuq gij canghhek Dunghmungz lumjbaenz Yeznanz、Menjden、Sinhgyahboh daengj daeuj doxcomz gvaq ciet. Ciuq gyoepsuenq, moix bi ndaw ngoenzciet miz 6000 lai boux canghhek bae Hwngzyen gaicawx vamaedlaeh caeuq cazva, miz 1000 lai gyaq cihung bae daeh va ci caz, miz baenz100 lai fanh vunzhek ganj bae gvaq ciet, aen ciet he guh gaicawx ngaenzsoq cungj youq 3 ik maenz doxhwnj, mingzdaeuz riuz doh seiqlengq.