Ciengmyauz dwg ngoenzciet conzdungj hoenghhwd beixnuengx Myauzcuz, ngoenzciet gyoengq vunz angqyangz doxcomz, angqhoh fungsou, mbaenjgouz bi moq rumz dingh fwn yinz, gohaeux fungsou, vunzlai ndangrengz vuenyungz.

Ciengmyauz, Vahmyauz gangj “naengznang”, gak dieg ngoenz gvaq ciengmyauz cix mbouj doxdoengz geijlai, youq Yungzsuij Myauzcuz Swciyen, gyoengq beixnuengx Myauzcuz dwg aeu liggaeuq ndwenit ngoenz samcib guh ngoenz haemhndaep, ngoenz daihngeih hainduj dwg gvaq cieng. Doenghbi neix daeuj, Yungzsuij mbangj Myauzcai gaenq dawz ciengmyauz caeuq ndwencieng doxhab hwnjdaeuj gvaq, hoeng mbangj Myauzcai lij itcig gvaq ngoenzciet conzdungj neix, ndawde suenq Dungdouz Yangh Luzcin Cunh gvaq ciet ceiq hwnghoengh. Luzcin Cunh dieg youq giz gapgyaiq Gveicouh caeuq Guengjsae, moix bi liggaeuq ndwenlab ngoenz coit (roeb ndwenit mbouj miz ngoenz samcib cix daen daengz co’ngeih) dwg beixnuengx Myauzcuz dangdieg cieng moq ngoenz daih’it. Ngoenz haemhndaep, rangh dieg neix ranzranz baet ranz seuqsat, gaj mou gaj yiengz (vaiz) loengh haujlai byaek gvaq cieng, vanzlij bwh baenz gang laeujhaeuxcid, caiq aeu gij haeuxcid ceiq ndei haenx daeuj guh “ceizcieng”, doxlwnz cingjhek caemhcaiq doxsoengq laexcieng, caezgya angqyangz soujhwnz, daengz gaeqhaen dangq daih’it le bae rap raemx moq ma, yienzhaeuh cawjranz youq henz saeuq dajcuengq caeq goengcoj. Ngoenz cieng moq banhaet, gak cuz beixnuengx gij mbanj song sengjgih henzgyawj haenx couh cangndang moqsup lwenqda dwk comz daengz Luzcin Cunh, Myauz、Yauz、Dung、Gun daengj gak cuz beixnuengx doxsug lumj ranz vunz ndeu nei, guh boq venz caijdangz、ciengq go eu fwen daengj hozdung, gwn ngaiz dep laeuj, angqyangz nauhyied dangqmaz. Gvaqlaeng cibgeij ngoenz ndawde, henzgyawj Luzcin Cunh song sengjgih sam aen yangh cib lai aen mbanj doxlwnz cingjhek, caezgya boq venz caijdangz, bae mbanj giet doengznienz, doxcomz angqyangz nauh cieng moq, gvaq 17 ngoenz le youq Liengzcai Yangh gih raeuz gvaq sat.

Gij fungsug hozdung ciengmyauz lai cungj lai yiengh, cawz itdingh aeu dajcuengq caeq goengcoj、boq venz caijdangz le, lij bae mbanj giet doengznienz dem, moix bi ciengmyauz, daengx mbanj mbwksai geijcib vunz roxnaeuz baenz bak vunz, cangndang gyaeundei, daiq aenvenz dwk roq gyong roq laz bae mbanjdoengznienz guh lienzvuen hozdung. Gyoengq vunz bae daengz bakmbanj le, sien boq venz lwnh gyoengq bouxcawj mbanjdoengznienz, gyoengq vunzcawj ndaw mbanj neix dingqnyi le caemh baenz mbanj vunz okdaeuj angqcoux, seizneix sing venz sing go hap rwenz byonghmbwn gwnz mbanj. Bouxhek itbuen youq baenz sam ngoenz, doengxngoenz boq venz caijdangz, guh boq venz doxdax, doengxhaemh yienj Heihmyauz, daengx mbanj hwnzngoenz sing go hap rwenz sing riu gyukgyad, angqyangz nauhyied cix mbouj caemdingh gvaq. Gyoengq bouxcoz caengz baenzgya haenx youq geij ngoenz neix cix angq dwk “naenghhwnz” doiq fwen doxgyau, ra boux doxngamj bonjfaenh, cingzeiq nangqnwt.

Ndaw ciengmyauz cawz gij hozdung baihgwnz gangj haenx le, lij banh miz vaiz doxdaemj、max doxdik、roeg doxdoj、nyingz naq、bin faexsaux daengj conzdungj dijyuz doxdax hozdung, nauhyied ndeiyawj, yinx baenz cien baenz fanh bouxhek bae humx yawj, doxcaemh guh’angq, nauhnauh yiedyied gvaq mbat ciet daegbied ndeu.