Seizdoeng gij rumznit ci haeuj ndang daeuj lumj mid camz nei, gou ndoj youq laj moeg, mbouj gamj okdaeuj, couh lumj dah niq lau yihnyaenq he. Yahdaiq gou baenz bingh lo, youq yen yw bingh, ndigah daxmeh ciengzciengz cawj doxgaiq soengq bae yihyen hawj yahdaiq gwn.

Gou menhmenh hwnqdaeuj, yienznaeuz gij rumznit youq ndaw rug gou youzlangh, hoeng gou hix aeu hwnqdaeuj, aenvih gou dungxiek lo, dungx yiengj gugu, caen miz di lumj gaeqboh heuh nei. Daxmeh naeuz hawj gou gvaq: Danghnaeuz daxmeh mbouj youq ranz, mwngz raen dungxiek, couh aeu swhgeij hag cawj haeux, cauj byaek, mboujnex, caj mwngz majhung, lienz haeux cungj mbouj miz gwn!

Naemj daengz coenz vah neix le, gou gamjdaengz miz di najnyaenq, couh hainduj doenghfwngz guhhong hwnjdaeuj, gou sien dawz byaek cuengq gwnz heng, yienzhaeuh dauqngeix gij yiengh daxmeh cawj byaek haenx, gvaek gvaek gvaek ronq byaek, seizneix gou youh siengj hwnj gawq vah he: Danghnaeuz mwngz mbouj guhhong, couh mbouj miz souhaeuj, danghnaeuz mwngz mbouj yungh fwngz guhhong, yienghhaenx mwngz daengzcog couh mbouj miz duix haeux gwn!

Gawq vah neix hawj gou rox bien govwnz seiq nienzgaep cek gwnz《Vuenyungz Dwg Gijmaz》.

Yaep he, gou hainduj cawj haeux lo, gou doq cawj haeux doq ronq byaek, yienzhaeuh ronq nohmou…… Gyoengq baengzyoux aeu geiq ndaej bw, mbouj naengz mbouj guh hong gwn ndwi! Aeu swhgeij doenghfwngz cawj doxgaiq cij ndaej gwn!

Gvaq le seiqcib faen cung, haeux cug lo, byaek hix cug lo, rangfwtfwt sawj gou myaiz cungj rih lo……

Daxmeh dauqma le, gou naeuz hawj daxmeh nyi gou gag cawj gwn, daxmeh haenh gou dwg boux baengh swhgeij guhhong gwn he.

(seiq nienzgaep Vangz Vazveiz)