Mboengqgonq, 《Gojgaeq Sanghaij》 Cazci youq Nanzningz hai aen bithoih 2013 《Gojgaeq Sanghaij》, gyoengq bouxdoeg、 bouxsij 《Gojgaeq Sanghaij》daj daengx guek gak dieg daeuj daengz Nanzningz doxcomz raennaj, gyoengqde gangj dijvei gangj souhaeuj swhgeij, dox gyauhliuz gingniemh. Youq gwnz hoih, mwh gyoengq bouxdoeg sengjrog yawjraen daengz Gvangjsih Minzcuz Bau, cungj doxciengj aeu daeuj yawj. Dah bouxdoeg Fuzgen Swngj Yamwnz Si ndeu yawj daengz Gvangjsih Minzcuz Bau Banj Sawcuengh seiz, roxnyinh gig geizheih, de fan bauqceij daeuj yawj, cix riu naeuz:“Yenzlaiz Sawcuengh dwg sawgyoepyaem, lumj Yinghyij nei, gou yawj mbouj rox, hoeng, gou doeg Banj Sawgun gvaq, roxnyinh banjde lanzmuz moq, dingzlai neiyungz cungj dwg sij gij saeh gij hong saujsu minzcuz, gig miz minzcuz daegsaek.”

(Veiz Yennaz sij ingj/韦愿娜 文/图)