“Bingbing bungbung……” Moix bi ngoenz laebcin haetromh, gwnz gai Lungzswng Gak Cuz Swciyen Bingzdwngj Yangh couh nauhyied hwnjdaeuj, gyoengq vunz daenj ndangdaenj Dungcuz ndeu cing duz “vaiz” hung ndeu, roq gyong roq laz cit bauqrengh dwk youq gwnz gai nauh “vaizcin” hoenghhwd. Gyoengq beixnuengx Dungcuz bouxboux daenj dauq buh moqsak gak saek gak yiengh youh lwenqda haenx caez bae baihnaj laeuzgyong doxcomz, aeu cungj fuengsik foux vaizcin、foux lungzfiengz Dungcuz gag miz neix guh hozdung “nauhcin”, boq aenhauh ndaemcin yiengj goksadsad, caemh lwnh hawj vunzlai rox gij hong bi moq couh baenzneix nyaengq hwnjdaeuj lo.

Youq ngoenz laebcin banh “nauh vaizcin” hozdung, dwg gij conzdungj beixnuengx Dungcuz ranghdieg Bingzdwngj Yangh, hozdung nauhcin swnhbienh angqhoh bi gonq ndaej fungsou, youh doenggvaq gij hingzsik baiq ciet mbaenj bineix bilaeng rumz dingh fwn yinz, couh baenz le gij hingzsik cujyau beixnuengx Dungcuz aen hozdung vwnzva cieng moq ndeu. Nauh vaizcin youq Bingzdwngj Yangh gak aen mbanj Dungcuz cungj miz, baez daengz ciet laebcin roxnaeuz ngoenzciet hung, gak mbanj roxnaeuz gak cuj cungj gyoebbaenz aen doih nauh vaizcin foedfoed nanghnangh ndeu, sien dwg youq gizdieg gyang mbanj hoengh nauh, riengzlaeng cij baez ranz baez hoh bae mbaenj fuk baiq ciet. Vaizcin itbuen aeu fiengzhaeuxnaz caeuq baengz miz saek guh baenz, daep aen gyaeujvaiz caeuq cug diuz riengvaiz ndeu, gyaeujvaiz、gaeuvaiz nem ceijsa hwnjbae, mad saekndaem veh davaiz, ndangvaiz aeu gaiq baengzndaem roxnaeuz baengzmong ndeu lienz hwnjdaeuj, youz doenghboux daeg- mbauq rengzak fwngz giuj ndang mbaeu daeuj fouxdoengh, boux ndeu loengh gyaeuj boux ndeu loengh rieng, duz vaiziq riengzlaeng vaizhung haenx cix dwg lwgnyez loengh foux; doiq gvanbaz daenj ndangdaenj Dungcuz ronghlwenq ndeu bouxgvan gwed cae rauq、fwngz gaem faexbien cing vaiz, bouxyah rap gei youq henz guhdoih byaij coh doenghreih doenghnaz, gyoengq beixnuengx mbangj aemq gyaep longz fansen mbangj beq aenrieng riengzlaeng gangjgangj riuriu caez byaij baenaj. Gyoengqde ciuqei gij yienghsiengq guhhong, con gai ndonj luengq, angqhoh gij hong baenz bi hainduj, doengzseiz mbaenj rumz dingh fwn yinz, haeuxgwn gogo fungsou.

Ngoenz ciet, gyoengq beix- nuengx Dungcuz yienj gij cezmuz vwnzyi daegsaek Dungcuz lai cungj lai yiengh, vaizcin nauh ndaej mizyinx、lungz fiengz saeceij fiengz fan hwnj gienj roengz caen nauhyied, gyoengq vunz yienj boq venz caijdangz angqangq yangzyangz, gyoengq bouxcoz baenq aen loekrin angq riugakgak, dawz gij minzcuz vwnzva caeuq minzcuz fungcingz beixnuengx Dungcuz gag miz haenx baijyienj hawj gyoengq bouxhek, baenzneix gawq ndaej vatgud caeuq fazyangz le vwnzva conzdungj Dungcuz, doengzseiz hawj vunzbiengz ndaej roxyiuj gij fungcingz vwnzva fungsug minzcuz Dungcuz. Cawz gij cezmuz vwnzyi ndawbiengz minzcuz neix le, beixnuengx Dungcuz lij aeu cungj hingzsik fwenhab Dungcuz 《Dohyeh》daeuj ciengq danq daj gaijgwz hailangh gvaqdaeuj gij bienqvaq hungloet rangh dieg Dungcuz, haenhdanq gij cwngzciu hungmbwk minzcuz cwngcwz dangj raeuz caeuq hwnjguh seveicujyi lajmbanj moq, yienh’ok gij saedceij vuenyungz beixnuengx Dungcuz.