“Daengngoenz baez hwnj ngoenz moqmat,

Yenzdan yat haeuj bi moq daengz；

Cuengh Gun cungj hag raeuz angqfaengz,

Song vah caez doeng vunzlai haenh.”

Gijneix dwg hot fwen danqhaenh hagdangz ndeu. 2013 nienz 12 nyied 30 hauh, Sawcuengh sawqniemh hag- dangz——Vujsenh Yen Dungzlingj Cin Sinhlungz Siujyoz guh hozdung yienj heiq angqhoh yenzdan, gyoengq saeseng caez eu hot fwen neix. Ciengz heiq angqcoux bi moq neix cujdiz dwg “hungzyangz minzcuz vwnzva, ciengqyiengj gij go seizdaih”. Guh hozdung ngoenzde, daj aen cezmuz gagciengq《Daengngoenz Seiziq Siujbahlangz》haidaeuz, ciepdwk miz《Guhhong Ceiq Miznaj》 daengj haujlai aen cezmuz Vahcuengh、Vahgun. Gyoengq doengzhag ciengq go ndei dingq dangqmaz, diuqfoux ndeiyawj dangqmaz. Daengx hagdangz lauxsae、 doengzhag, lijmiz haujlai vunz ndaw ranz hagseng cungj haenhndei, dopfwngz robrob. Heiq siujbinj Vahcuengh 《Haenh Hagdangz Raeuz》 ceiq ndeiyawj: Seiq boux canghheiq iq yungh gamjsouh swhgeij, danqhaenh Sinhlungz Siujyoz guh hong Cuengh Gun song saw vah sonhag aeu ndaej cingzcik hung, boux- yienj lij caeuq bouxyawj doxcam doxdap, ciengzmienh gikdoengh vunz caeuq gujvuj vunz lailai.

Baez hozdung neix, baijok gij cingsaenz funghmau minzcuz hagdangz, coicaenh gyoengq doengzhag haenqrengz baenaj.